Ве мачи несоница? Ви претставуваме неколку помошници за подобар сон

Доколку ве измачува несоница, посветете им внимание на овие можни причинители, кои често ги занемаруваме.

Не го наместивте креветот? (Текстот продолжува по огласот)

Уреден кревет – мирен сон. Не, не станува збор за стара народна поговорка, туку за заклучокот од истражувањето над 1.500 испитаници, кое го спроведе американската Национална фондација за сон. Резултатите покажаа дека лицата што настојуваат нивниот кревет да биде уредно наместен во 19% случаи спијат поквалитетно.

Местењето на креветот ни помага да се навикнеме на идејата дека на тоа место ќе ги поминеме следните 7-8 часа“, пишува д-р Катарина Ледерле, авторка на книгата Sleep Sense и основачка на лондонската клиника за сон somnia.org.uk.

Уште еден трик? Свежо испрани чаршафи: дури 75% испитаници изјавиле дека спијат подобро кога постелата им мириса „на чисто“.

СОВЕТ ПЛУС: проверете во каква состојба е душекот на кој спиете. Експертите препорачуваат душеците да „дишат“, да се направени од материјали и слоеви што овозможуваат проток на воздухот, затоа што на тој начин потта ќе испарува, па во душекот нема да се создава микроклима поволна за развој на бактерии и гадинки – така ќе го избегнете чувството на влага и непријатност.

ИМАТЕ НЕДОСТИГ ОД КАЛЦИУМ

Сигурно знаете дека пред спиење не треба да пиете кафе и дека чашка-две алкохол ќе предизвикаат да спиете полошо и почесто да се будите. Но дали знаете дека вашиот мирен сон може да го саботира недостиг од калциум во организмот?

Здравствено истражување спроведено во Австралија покажа дека дури 73% жени не внесуваат доволни количества од овој минерал.

Калциумот и магнезиумот се важни за здраво функционирање на мускулниот и нервниот систем, така што недостигот од еден од овие два минерала може значително да влијае врз способноста на организмот да се опушти и да потоне во закрепнувачки сон.

Почесто консумирајте витамин Д за да му овозможите на организмот да го искористува калциумот“, советува австралискиот научник Либи Вивер, нутритивна биохемичарка и авторка на неколку книги посветени на здравјето.

Посакајте им добредојде во својата кујна на свежото какао и на зелениот листен зеленчук. Исто така, зошто вечерата да не ви стане лек против несоница? Триптофан е аминокиселина што се претвора во хормонот на сон – мелатонин.

Пилешкото и мисиркиното месо, јајцата и лососот се добри извори на триптофан, исто како и јаткастите плодови и семките. И јаглехидратите имаат значајна улога во подготвувањето на организмот за квалитетен сон, бидејќи помагаат триптофанот да стигне до мозокот.

ВЛЕГОВТЕ ВО ПМС

Непосредно пред менструалниот циклус постои можност вашиот сон да биде често прекинуван, а за тоа обвинете ги „полудените“ хормони.

Во тој период доаѓа до опаѓање на прогестеронот и естрогенот, со што се менува „хемијата во мозокот“, правејќи нè понервозни и понапнати одошто во другите фази на циклусот, а тоа влијае врз квалитетот на сонот.

На некои жени во текот на предменструалната фаза најголем проблем им претставува покачениот естроген, кој може да доведе до оптоварување на црниот дроб“, објаснува австралискиот научник д-р Либи Вивер.

Затоа се препорачува избегнување храна што го оптоварува овој орган, алкохол, рафинирани шеќери и кофеин. На голем број жени овој проблем им создава вишок на стрес-хормони, па затоа се препорачува да ги научите техниките за дишење и медитација. Корисни се и билните чаеви со смирувачко дејство, како и соодветни додатоци во исхраната.

Најдобро е да разговарате со вашиот гинеколог, кој ќе ве упати на ендокринолошко тестирање.

СПИЕТЕ СО ЗАТВОРЕНИ ПРОЗОРЦИ И ВРАТА

За време на зимата спиете со затворени прозорци и врата во спалната соба? Доволна ви е вашата несоница и не сакате дополнително да ве вознемируваат звуци за време на ноќта? Холандските научници тврдат дека отворени прозорци и врата ќе ви го подобрат сонот.

На Технолошкиот универзитет во Ајндховен биле проучувани 17 луѓе, кои прво спиеле во затворени, а потоа во отворени спални соби. Резултат? Во отворените простории нивото на јаглерод диоксид е пониско, што овозможува подобро дишење, а пониска е и температурата на воздухот, како и температурата на телото. Сето тоа има позитивно влијание врз квалитетот на сонот.

СОВЕТ ПЛУС: секогаш кога сте во можност, спијте со отворени прозорци и врата. Исто така, се препорачува и да го исклучите греењето пред спиење. Кога температурата во просторијата е пониска, тогаш опаѓа и температурата на телото, а тоа го доведува организмот во состојба на сонливост. Експертите препорачуваат температурата во спалната соба да биде околу 18 степени.

Доколку не постои можност да спиете во отворена просторија, размислете да набавите прочистувач на воздухот.

Текст: Наташа Човиновска

Фото: Getty Images