Избрани се 10 финалисти, кои понатаму ќе се натпреваруваат со финалистите од другите пазари каде што работи НЛБ Групацијата, за една од вредните парични награди.
„Кантрисајд ретрит“ е првиот зелен центар кој нуди бесплатна терапија со животни за лицата со физички и ментални предизвици. Кои се придобивките од ваквиот пристап и како тој придонесува за зголемување на степенот на инклузија, ни откри Мариа Дуда.
Отсекогаш си била позната по љубовта кон животните. Сите животни на твојот ранч се вдомени и спасени од ужасни услови, а сега живеат заедно во хармонија. Колкаво е вашето семејство моментално и кои членови го сочинуваат?
Нашата банда на животни се зголемува, и сега со најновиот член штркот Пипи,The Countryside брои 44 члена. Имаме еж Боцко, камерунски мини кози, патката Доналд и паторот Би Џиз, магаренца, зајчиња, кокошки, коњи, мачки, кучиња, желка и папагали.
Од каде идејата за вакво нешто?
Сосема спонтано. Сѐ почна во екот на ковид-пандемијата кога скршив нога и немав каде да одам на рехабилитација за да проодам, па така се создаде базен со платформа за да можат да пристапат лица со инвалидска количка, потоа мини-бар пристапен за лица со попреченост и така почнаа да се редат коцките. Сега сме пионери во тоа и многу ми е драго.
Што е хипотерапија и кои се придобивките што ги нуди?
Ние сме пресреќни што НЛБ ја препознаа нашата идеја за хипотерапија кога аплициравме за нивниот повик „Рамка за помош” и што сме едни од десетте финалисти од државата. Хипотерапија е збир на вежби за лица со физички или ментални предизвици со помош на движењето на коњот.
Насекаде во светот ги препознаваат придобивките од хипотерапијата и ако се најдеме меѓу трите главни добитници на престижните НЛБ регионални награди, би сакале да ѝ понудиме на јавноста бесплатни сесии цела година. Најголеми придобивки се подобрување на психомоторните движења, зголемување на самодовербата, концентрацијата и слично.
Што друго нуди „Кантрисајд ретрит“?
Периодов што следи веќе почнуваме со еднодневни посети од разни училишта, им нудиме на училиштата гледање и изучување животни вештини, при што најмладите се во допир со природата и животните, и едуцираме преку игри. Имаме работилници и отворени сме за соработка со општествено одговорни компании, како и за индивидуални и фамилијарни посети со претходна најава и резервација.
Разговарала: Марија Лукаревска
Фото: приватна архива