Каква е Кејт Мидлтон во приватниот живот: Жена која навистина го живее она што јавно го зборува!
Близок пријател открива
Тоа е живот на една обична вработена мајка со три мали деца, само што таа има малку поинаква работа од повеќето жени
Војвотката од Кембриџ, Кејт Мидлтон, е една од најпопуларните жени на светот и дефинитивно е една од најприсутните во медиумите, бидејќи ѝ е интересна на јавноста.
Без разлика дали се работи за облеката што ја облекла или за (ретките) пикантерии од приватниот живот, луѓето постојано се интересираат за неа, а особено за тоа каква е кога камерите се исклучени и кога нема папараци во близина.
Во интервју за магазинот „Пипл“, пријател на британската војвотка кој сакал да остане анонимен, го открива токму тоа – каква е Кејт приватно, на што е најмногу посветена и како се однесува со луѓето околу себе.
„Таа најдобро се чувствува дома – нормална куќа полна со обврски и деца што трчаат наоколу, расфрлаат предмети и прават белји. Кога ќе ја видите зад затворени врати со децата, таа е мајка полна со самодоверба, но кај неа нема претерување. Децата секогаш се искарани ако претераат во нешто“, раскажал изворот.
Иако е позната по беспрекорниот изглед, пријателот тврди дека дома е потполно опуштена.
„Косата ѝ е врзана во коњско опавче, носи многу малку шминка, а облекува спортска облека за вежбање или најобичен удобен фустан и патики. Ако некаде доцни, прво се јавува да се извини. Тоа е животот на една обична вработена мајка со три мали деца, само што таа работи малку поинаква работа од повеќето жени“, раскажал пријателот на Кејт.
Изворот открива и дека за Кејт најголемиот приоритет се децата, принц Џорџ (7), принцезата Шарлот (5) и принцот Луис (2) и дека се труди нивното воспитување и растење да биде што е можно понормално.
„Многу ѝ е важно децата да пораснат со нозе на земја и да бидат свесни за реалниот живот.“
Според пријателот, во текот на викендот, Кејт ги носи децата во Mable’s Paint Pot, каде што учат да бојосуваат садови и да прават десерти. Со сопругот принц Вилијам често излегува навечер во локални пабови, каде што зборуваат за децата и животот, како и сите други парови и родители.
„Би биле изненадени од тоа колку се тие нормален и прекрасен, заљубен пар“, тврди пријателот.
Кога ситуацијата со епидемијата на коронавирус дозволува, Кејт ги носи децата кај нејзините родители за да поминат време со нив, но и за да си олесни себеси. Кога никој од роднините не може да ги чува децата, Кејт се потпира на семејната дадилка Марија Борало, која е со нив од 2014 година, кога принцот Џорџ имал осум месеци.
Кејт има и своја десна рака, Наташа Арчер, која ѝ е пријателка, стилист и личен асистент.
„Кога ќе ги погледнете луѓето околу Кејт, тоа е еден мал, близок тим. Кејт би била изгубена без Марија, Наташа и другите на кои има навикнато. Сите работат напорно, но ќе направат сè за да може Кејт да постигне рамнотежа“, открива пријателот.
Како што тоа ѝ е приоритет во работата, менталното и емоционалното здравје се од клучно значење и во нејзиниот приватен живот.
„Таа не се плаши да ги сподели и тешките искуства што лично ги доживеала во својот живот и во воспитувањето на децата“, раскажала Кет Рос, директорка на организацијата Baby Basics, во која Кејт волонтирала летоска.
„Таа навистина го живее она што го зборува јавно“, заклучил пријателот на Кејт.