Па кој држи диети денес? Никој, тоа е тотално ретро. Но затоа речиси сите сме на некаква програма за исхрана. Сепак, во морето од информации, тешко е да се процени кои се корисни, не само за витата става, туку и за здравјето, а кои се штетни. Затоа, пред да одлучите да исфрлите одредени намирници од исхраната, земете ја предвид нашата листа „за и против“…
БИДЕТЕ ВНИМАТЕЛНИ…
Кетогена исхрана
Потпишан во 1920 година како дел од терапија за лекување епилепсија, овој нискокалоричен режим на исхрана богат со масти го поттикнува телото да ги користи мастите како извор на енергија наместо јаглехидратите, како би се намалиле епи-нападите.
За: овој начин на исхрана доведува до подобрување на лабораториските резултати, но нема промени во однос на телесната тежина.
Против: јаглехидратите се драстично намалени на помалку од 5 отсто од дневното количество калории. Се исклучува консумирање овошје, зеленчук, интегрални житарки и мешунки, па не се задоволуваат дневните потреби од хранливи состојки без големи количества додатоци, за надоместување на витамните и минералите.
Заклучок: начин на исхрана, кој е пропишан за решавање на конкретен здравствен проблем, не треба да се користи за намалување на телесната тежина. Подобрувањето на здравствената состојба кое го носи кетозата всушност се постигнува секој пат кога значително ќе се намалат калориите, така што не треба да веруваме дека овој ефект може да се постигне само со кетоген начин на исхрана.
Триесетдневна програма
Во оригинал наречена Whole 30, програмата подразбира 30 дена без шеќер, вештачки засладувачи, млечни производи, житарки, мешунки и алкохол. Цел е да се „ресетираат“ нашите навики во исхраната, да се детоксицира телото и да се излекува од воспалетителните процеси предизвикани од храната. Ако згрешите, почнувате од почеток.
За: многу овошје и зеленчук. Нема броење калории и мерење, затоа што акцентот е на бенефитите од здравиот начин на исхрана, а не на губење килограми.
Против: бара целосна промена на животните навики за да ја спроведеме диетата. Не постои долгорочен план за одржување на тежината (односно за спречување на повторно воспаление) по 30 дена, колку што трае режимот.
Заклучок: оваа диета е ограничувачка, а 30 дена не е доволно време да кажете дека сте целосно здрави или да го смените начинот на живот.
Испрекинат пост
Понекогаш ја нарекуваат и диета 5:2. Овој режим подразбира два дена да се внесуваат помалку калории (500-600), додека преостанатите пет дена исхраната е „нормална“. Основата е да се прелаже телото, така што ќе помисли дека чувствува глад, поради што ќе почне да ги согорува мастите наместо да ги складира.
За: исклучително е тешко да се најде макар една предност.
Против: малку насоки за тоа што треба да се јаде, особено во деновите кога не се пости. Внесувањето калории во краток временски интервал е ограничено на неприроден начин. Таквиот начин на исхрана е во тесна врска со покачен индекс на телесна маса.
Заклучок: ограничувањето и лишувањето на крај доведуваат до прејадување. Секогаш.
Поврзани објави
Палеоисхрана
Експертите велат – јадете како нашите предци за да бидете здрави, бидејќи тоа што јадеме преработена и полуготова храна е најголем причинител за сите наши здравствени проблеми.
За: готовата и полуготовата храна се целосно исклучени од исхраната. Акцентот е на примарните намирници и на немасни видови месо. Против: недостигаат две големи групи намирници – интегрални житарки и млечни производи. „Отворените оброци“ овозможуваат да „мамите“ секогаш кога ќе почувствувате потреба.
Заклучок: ние не ловиме, не собираме храна и не фаќаме риби на начинот на кој го правеле нашите предци и денес не постои идентична храна на онаа што ја јаделе луѓето во палеолитот. Секоја диета што препорачува „мамење“ или дозволува да лапнете кифлички со мармалад, а притоа се крие зад здрав назив кој влева доверба, е чиста измама.
А СЕГА, ПАЛЦИТЕ ГОРЕ…
DASH
Начинот на исхрана, чија цел е да ја запре хипертензијата (DASH), е осмислен за да се лекуваат и да се спречат болести на срце. Се темели на балансирана и умерена исхрана.
За: на одговорен начин, се ограничува консумирање црвено месо, натриум, полномасна и слатка храна. Се поттикнува јадење овошје, зеленчук, интегрални житарки, немасни протеини, здрави масти, јаткасти плодови и мешунки. Со текот на времето, начинот полека се менува. Не постои недозволена храна. Претставува природен, современ и разумен пристап во решавање на здравствените проблеми и телесната тежина.
Против: доколку јадеме надвор од дома, тоа може да биде проблем затоа што порциите во рестораните се големи и богати со лоши маснотии.
Заклучок: губењето килограми е вообичаена нуспојава при здрава и урамнотежена исхрана, како оваа. Овој начин на исхрана е одржлив и можете да го применувате до крајот на животот.
Медитеранска исхрана
Се темели на исхраната и на животниот стил карактеристични за медитеранските краеви. Медитеранските жители, генерално, се долговечни и здрави, а се смета дека во тоа клучна улога играат храната и начинот на живот.
За: свежа храна, интегрални производи, риба, мешунки, јаткасти плодови и други здрави масти се дел од секојдневниот оброк. Нема претерување во консумирање алкохол, а црвеното месо и слатките се резервирани исклучиво за посебни пригоди и во ограничени количества.
Мани: нема. Голем број ресторани нудат медитерански јадења и – доколку покрај нив нарачате голема порција салата или овошје, не грижете се!
Заклучок: од сите здрави начини на исхрана, овој е најздрав. Одржлив е, се темели на интуитивни начела, а главен збор имаат интегралните производи.
ТЕКСТ: БОЈАНА СТОЈМЕНОВИЌ
ФОТО: UNSPLASH