Ако ви е доста од здрави јадења и сакате да се најадете како човек, овој рецепт е за вас!
Потребни состојки:
- 100 грама путер
- 2 лажици масло
- 400 грама пилешко бело месо
- прстофат сол и бибер
- 40 чешниња лук
- 300 милилитри бело вино
- 1 лажица брашно
- 300 милилитри пилешки бујон
- 100 милилитри павлака за готвење
- рендана кора од лимон
- гранче рузмарин
- 200 грама шампињони
- 1 литар млеко
- малку брашно
- кори за лазањи
- 200 грама кашкавал
Приготвување:
Во подлабоко тенџере загрејте масло и 50 грама путер, па додајте 400 грама пилешко бело месо како цели парчиња и оставете го да се динста околу 10 минути. Додајте сол и бибер, па кога пилешкото ќе биде речиси готово, извадете го месото од маснотиите. Во истите маснотии каде што се динсташе месото, додајте уште 50 грама путер и 40 чешниња лук и оставете ги да потемнат.
Кога лукот ќе пушти арома, додајте бело вино и малку брашно, па оставете го да крчка. Кога смесата ќе стане густа, додајте пилешки бујон, рендана кора од лимон, гранче рузмарин, малку павлака за готвење и оставете го сето тоа да зоврие. Во оваа смеса вратете го пилешкото месо, па посолете уште малку и додајте бибер.
Сето тоа ставете го во рерна да се испече на 250 степени околу 15 минути.
За тоа време, во тавчето динстајте ги шампињоните, а одвоено направете бешамел од 1 литар млеко, путер и брашно.
Редете ги лазањите, така што во огноотпорен сад прво ќе ставите бешамел, па кори за лазањи, смесата со пилешкото и лукот, па повторно кори за лазањи, печурки и бешамел. Повторувајте ја постапката додека не ја потрошите смесата. Завршете со кори врз кои ќе наросите бешамел и рендан кашкавал.
Печете ги лазањите 30 минути на 200 степени Целзиусови. Послужете ги топли. Добар апетит!
Погледнете го видеото за подетални упатства.