Чоколадо и цимет – кој не ја сака оваа комбинација?
Секако, секогаш најлесно е да стопите чоколадо и путер (количинскиот сооднос обично е 3:1 во грамови) и ќе добиете фил за торта, но зошто да не ги збогатите вкусовите?
Еве неколку идеи…
Цимет и крем-сирење
Овој фил за торти и колачи е многу едноставен, а богат со вкусови.
Состојки:
- 230 г омекнато крем-сирење
- 1/2 шолја (од 250 мл) шеќер во прав
- 1/2 лажиче цимет
- 1/4 шолја млеко
Измешајте ги сите состојки во сад и добро изматете со миксер. Чувајте го филот во фрижидер до употреба.
Кафе и путер
Овој фил исто така е збогатен со цимет, но она што му дава прекрасен вкусен е инстант-кафето.
Состојки:
- 1 лажиче инстант-кафе во гранули
- 1/2 лажиче цимет
- малку сол
- 1 лажиче екстракт од ванила
- 1/2 шолја омекнат путер
- 3 шолји шеќер во прав
- 1/3 шолја млеко
Ставете го кафето во сад и гмечете го со лажиче додека се претвори во прав. Измешајте цимет и сол. Во друг поголем сад матете го путерот со миксер додека омекне и стане воздушест, па додајте мешавина од кафе, цимет и сол, а на крајот и екстракт од ванила. Додавајте ги полека шеќерот во прав и млекото матејќи додека ја добиете посакуваната густина на филот.
Рум и чоколадо
Овој рецепт е погоден кога правите поголема количина на колачи.
Состојки:
- 4 шолји слатка павлака
- 1/4 шолја несолен путер
- 1/4 шолја шеќер
- 560 г чоколадо за готвење, исечкано или изрендано
- 1/3 шолја рум
- 2 лажички екстракт од ванила
Павлаката, путерот и шеќерот измешајте ги во тенџере, па загревајте ги на средна температура додека шеќерот се растопи и филот зоврие. Тргнете го од шпорет, додајте 560 г рендано чоколадо и мешајте додека се растопи. Додајте рум и ванила. Добро измешајте и чувајте го во фрижидер до употреба.
Наједноставниот чоколаден фил
Состојки:
- 300 г квалитетно темно чоколадо, грубо исечкано
- 100 г путер
- 250 мл помасна павлака
Измешајте ги сите состојки, ставете ги на шпорет на ниска температура, загревајте мешајќи додека се соединат состојките и чоколадото и путерот се стопат. Тргнете го од шпорет, оставете го да се лади 5 минути. Ставете го во фрижидер. Кога филот целосно ќе се олади, пред користење извадете го од фрижидер и кратко матете го со електричен миксер.