Зеленчукова гозба: Пробајте ѓувеч со кускус за ручек!
За 4 лица, потребно време за приготвување: 70 минути
Искористете ги зрелите плодови од сезонскиот зеленчук, комбинирајте ги со месо и со житарки, за да добиете вкусни и здрави оброци
Ѓувечот послужете го додека е топол, при мирувањето кускусот ќе се залепи и ќе поприми текстура на гриз. Пробајте!
Состојки:
- 2 главици црвен кромид
- 2 црвени пиперки
- 2 моркова
- 1 тиквичка
- 5 пилешки карабатаци
- 100 г кускус
- 1 л зеленчукова супа во коцка
- црн пипер
- масло
- сол
Приготвување:
1. Црвениот кромид се чисти и се сечка на коцки, црвените пиперки исто така се чистат и се сечкаат на покрупни коцки, а морковите на крукчиња. Тиквичките се лупат и се сечкаат на коцки.
Поврзани објави
2. Во поголемо тенџере на малку масло се пржи црвениот кромид, а потоа се додаваат пиперките и морковите, па сето тоа заедно кратко се пржи.
3. Се додаваат тиквичките и понатаму се динста, долевајќи по малку зеленчукова супа, десетина минути.
4. Карабатаците кратко се пржат во тава на малку масло, да поруменат. Се цедат од вишокот маснотија и се додаваат во тенџерето со зеленчукот. Динстањето продолжува додека омекне месото.
5. Потоа се посипува кускусот, се посолува и запиперува по желба, па се меша. Огноотпорен сад се намрсува и во него се става смесата од месо и зеленчук. Се прелева со супата, да пливаат состојките, и се пече во загреана рерна додека кускусот набабри и ја впие потребната течност.
Извор: Добра храна