Ѓувеч од рерна

На љубителите на колбаси дефинитивно ќе им се допадне овој вкусен ѓувеч, кој се приготвува во рерна.

Состојки:
* 2 компира со средна големина

* 1 млада тиквичка

* 1 страк праз

* 2 моркова

* 2 црвени пиперки од замрзнувач

* 2 лаврови листа

* 150 г ориз

* 4 свежи тенки скараџиски колбаси

* 350 мл доматен сок

* зеленчукова супа по потреба

* 1 лажиче пипер

* црн пипер

* сол

* 30 мл масло

Приготвување:
1. Компирите и тиквичката се лупат и се сечат на коцки со средна големина.

2. Празот и морковите се чистат и се сечат на коцки, а црвените пиперки и скараџиските колбаси се сечат на покрупни парчиња.

3. Во вангла се соединуваат компирите и тиквичките, па се додаваат сечканиот праз и морковите.

Се ставаат пиперката, лавровиот лист, скараџиските колбаси и оризот, се прелева со малку масло, па се посолува и запиперува по желба. Полека се меша за да се распределат рамномерно состојките и зачините.

4. Смесата се претура во огноотпорна чинија, се прелева со доматниот сок и се долева зеленчукова супа по потреба, да се прекријат состојките.

5. Се пече во загреана рерна на 200°C, додека омекне зеленчукот, а оризот да набабри. Во текот на печењето во неколку наврати јадењето се меша и се додава уште малку супа по потреба.

Текст и фото: „Добра храна“