Победничката на „Заблескај“, Александра Трајческа: Ми значеше коментарот на Николче Мицески! (ВИДЕО)

Талентираната прилепчанка Александра Трајческа (19) е победничката во втората сезона на оналјн-натпреварот во пеење „Заблескај“, кое е оригинален мултимедијален проект на компанијата „Колор медиа плус“ и магазинот „Убавина и здравје“, поддржан од ОРБИТ.

Александра успеа да ги освои максималните бодови од жирито, чии членови беа композиторот Николче Мицевски, пејачката Александра Јанева, естрадниот новинар Антонио Димитриевски и модната дизајнерка Маја Кикириткова.

Вкупно во финалето се натпреваруваа 12 кандидати, а Александра со својата изведба на џез-нумерата Orange Colored Sky блесна и го освои првото место.

Талентираната Трајческа не ги криеше импресиите по победата….

Најпрво, честитки за победата. Очекуваше ли дека токму ти ќе бидеш ѕвездата што најмногу ќе „заблеска“?

• Благодарам, да бидам искрена, не очекував, сметам дека конкуренцијата беше голема и никогаш не знаеш со сигурност дали твоето лично изразување ќе му се допадне на жирито.

Ти на истото талент-шоу беше и пред две години, но тогаш за „влакно“ ти избега првото место. Што значи оваа победа за тебе?

• За мене оваа победа е доказ дека работата на себе и на она што го сакаш се вреднува и исплаќа, ме мотивира да продолжам да споделувам дел од својот карактер и емоции на сцената преку настапите.

Освои и парична награда од 1.000 евра. Размислуваш како ќе ги потрошиш парите?

• Па би сакала да ги вложам во музика, дали тоа значи авторска песна или некој фестивал – се’ уште не сум сигурна.

Кој ти честиташе прв за победата од твоите најблиски луѓе?

• Моите сестри!

Чиј коментра од жирито ти остави најголем впечаток?

• Сите коментари беа одлични, но сепак некако во меморија ми остана оној на Мицевски. (погледнете го коментарот на Николче)

Ако беше ти во жирито, кој спред тебе заслужи исто така да победи?

• Мислам дека сите кандидати имаа шанса да ja земат победата во свои раце, но мој фаворит беше Сергеј Попоски.

Ајде малку да ни откриеш приватни работи за тебе. Која е Александра Трајческа кога не е во светот на музиката?

• Па љубител сум на добар психо-роман и крими-серија, сакам природа и колку можам повеќе ги посетувам природните убавини во Македонија, но дефинитивно во кој и град да сум, ако има рок блуз, фанк-свирка/концерт, таму сум.

Дали си можеби заљубена?

• Има различни дефиниции за што се’ е љубов па… да сум.

Која е твојата најголема цел во музиката, каде би сакала да бидеш за пет или десет години од сега?

• Би сакала да бидам на сцена пеејќи свои песни, во секоја од тие песни да има делче моја душа, а слушателите да ги доживуваат и да се чувствуваат разбрано.

Кои се твоите идни планови, како замислуваш да тече твојот музички пат сега после победата?

• Продолжувам да работам, да уживам во музиката а потоа ќе чуете и нешто мое.