Ви откриваме еден едноставен рецепт за приготвување домашен кечап. Многу е повкусен и поздрав од куповниот, па вреди да го пробате!
За две тегли од 500 г потребно ви е:
Состојки:
- 2,5 кг зрели домати
- 1 главица црвен кромид
- 3 чешниња лук
- 50 мл јаболков оцет
- 2 рамни лажици морска сол
- 2 лажици шеќер
- неколку гранчиња свеж босилек
- 2 см корен од свеж ѓумбир
- прстофат конзерванс
Приготвување:
Поврзани објави
Доматите се мијат и се сечат на покрупни коцки, а потоа се ситнат во блендер.
Нектарот од доматите се става во тенџере и се вари околу 60 минути, додека се редуцира.
Црвениот кромид се чисти и се сече на коцки, лукот се пасира, ѓумбирот се ренда, а босилекот се ситни.
Откако сокот од домати ќе почне да се згуснува, се додаваат јаболковиот оцет, ѓумбирот, црвениот кромид и лукот, босилекот, шеќерот и солта. Потоа се вари на умерена температура, додека се добие посакуваната густина. При крајот на варењето во кечапот се додава конзервансот и се меша додека се стопи. Готовиот кечап се миксира со миксер.
Теглите добро се мијат и се стерилизираат во загреана рерна на 100°Ц. Врелиот кечап се сипува во топли тегли и се затвораат. Потоа се виткаат и се оставаат целосно да се оладат.
Текст: Добра храна