Домашни препарати против болки во мускулите и во тетивите (и за брзо отстранување модринки)

Во аптека можете да купите скапи масти и таблети, а исто така можете да користите и ефикасни билки. Особено ако живеете надвор од град…

За мускулите – билки, топлина и одмор

За време на акутно воспаление на мускулите (миозитис) е неопходен целосен одмор. Ако ве болат мускулите на грбот, нозете или стомачните мускули – се препорачува да мирувате во кревет. Во случај на миозитис на мускулите на раката, сите домашни работи, дури и најлесните, се контраиндицирани.

! При миозитис одлично помага топлината, но прегревањето, како и ладењето, може да предизвика влошување на болеста.

Како да се намалат воспалението и болката:

* Помешајте цветови од црвена детелина – три дела; билка лисичинка (лат. Borago), кантарион и коњска детелина – по два дела; корен од пиреј – еден дел. Една лажица од мешавината прелејте со половина литар зовриена вода и оставете ја да отстои 30 минути, исцедете ја и испијте ја во текот на денот во три наврата, 15 минути пред јадење.

* Помешајте билка петопрст (лат. Potentilla argentea) – четири дела; бело иванденче (лат. Galium mollugo) – три дела; цветови од медуника – два дела и плодови (семе) од сина чичка – еден дел. Една лажица од мешавината сипете во термос со 300 мл зовриена вода, оставете да отстои еден час, па исцедете. Земајте по две лажици четири-пет пати на ден пред јадење.

* Како лек против надворешни болки се препорачуваат облоги со одвар од темјан – две лажици сува билка прелејте со шолја зовриена вода, оставете да отстои 30 минути, па исцедете.

* Помагаат и облоги со одвар од матичина – две лажици сува билка прелејте со 300 мл зовриена вода

Ударите и модринките брзо поминуваат

* Во случај на удар, за што побрзо да се намалат модринките и подливите, на болното место ставете нешто ладно – барем ќеса со мраз или ладна вода. Ладната облога менувајте ја на секои две-три минути, модринката ладете ја 30–40 минути, а потоа стегнете ја со гумиран завој. По два-три дена ставајте топли облоги, втривајте тинктура од невен, бреза или пупки од топола (сите овие тинктури можете да ги купите).

* За брзо санирање на модринките исто така можете да користите компреси со одвар од следените билки (две лажици од суровината на 300 мл зовриена вода): цветови од вратика (лат. Tanacetum vulgare), чубрика, корен од соломонски печат(лат. Polygonatum odoratum), кантарион, камилица.

* Помош при силни удари (каде што не е оштетена кожата) даваат и топли компреси со одвар од следните билки (сите во еднакви количества): горчлив пелин, трева или цветови од горчлива арника или брденка (лат. Arnica montana), коњска детелина, петровец или камшик (лат. Agrimonia eupatoria) и цветови од аптекарска камилица. Две лажици од мешавината сварете во половина литар вода, оставете да отстои еден час, па исцедете. Облогите нанесувајте ги на повредените места три-четири пати дневно.

КОМПРЕСИ ПРОТИВ ХЕМАТОМИ

* Со кромид, мед и тегавец

Исечкан кромид помешајте со една лажица прав од листови од тегавец и со исто количество мед. Мешавината ставете ја на пареа и загревајте ја додека се стопи медот. Смесата нанесете ја на газа и ставете ја на модринката. Преку тоа ставете најлонско ќесе и прекријте го ткаенина. Држете го два часа. Практикувајте го трипати дневно.

* Грашок и белки

Направете кашичка од недозреани зрна од грашок и во неа додајте изматена белка. Нанесете ја на местото на ударот и држете ја 20 минути, па измијте ја со ладна вода.

Доколку сте ги оштетиле лигаментите

* Опуштете ја раката или ногата и на болното место нанесете нешто ладно – ќеса со мраз, снег, ладна вода или крпа натопена во ладна вода. По час и половна или два, ако отокот и болката се намалиле, повредениот зглоб цврсто змотајте го со завој.

* За отстранување на отоците и болките се користат и облоги со одвар од вратика, пелин, синчец, врес, седум, опашкин штир.

Во случај на повреди проследени со оток

* Ефикасна е мешавина од петровец – три дела; корен од бел смил, црвен здравец, велигденче и капина камењарка – по два дела и соломонски печат – еден дел. Една лажица од смесата прелејте со шолја зовриена вода, варете ја на тивок оган 10 минути, оставете ја да отстои 20 минути, исцедете ја и испијте ја во текот на денот на три-четири пати, пред јадење.

Текст: И. Свитенкова, натуропатка