Пробајте ги рецептите од нашите гастро-блогери
Вкусните специјалитети со риба и морски плодови се здрави, нискокалорични и богати со хранливи состојки што ќе ве заситат, а нема да остават последици на вашата линија. Немате идеја како да ги искомбинирате со состојките што веќе ги имате во кујната? Побарајте инспирација на нашите гастро-страници!
Печен лосос со ориз и авокадо
Лососот е одличен извор на протеини, омега-3 масни киселини, витамини и минерали. Пробајте го во комбинација со ориз и авокадо, по рецепт на Теодора Павловска, на Инстаграм позната како @myglutenfreecorner
Состојки:
- 2 парчиња лосос
- 1 лажиче сенф
- 1 лажиче масло
- црвен пипер
- сол
- 1/2 шолја ориз
- авокадо
- краставица
Приготвување:
1. Исечкајте го лососот на мали коцки и додајте сенф, масло, пипер и сол. Измешајте ги сите состојки и ставете ги коцките лосос на хартија за печење, па печете ги 15-20 минути на 200˚Ц.
2. Во меѓувреме, ставете го оризот да се вари заедно со три шолји вода.
3. Откако ќе се свари оризот, истурете го вишокот вода, додајте млаз ладна вода и исцедете го со помош на цедалка.
4. Во чинија сервирајте ги оризот, лососот, авокадото и краставичките. Одозгора ставете потпечен сусам и цеден лимон по желба.
Пад таи со ракчиња
Надежда Шодан (@nadezdashodan) успеа да ги претвори обичните нудли во кулинарско ремек-дело! „Иако ова не е класично, автентично пад таи, бидејќи се изоставени неколку состојки, а додаден е зеленчук, вкусот е ист, само збогатен“, порачува таа и ве поканува да го испробате!
Состојки за 2 лица:
- 2 порции оризови нудли
- 500 г свежи ракчиња
- 1 голем морков
- 1 кромид
- неколку млади кромитчиња
- 1/4 зелка
За сосот:
- 1 лукче низ преса
- 1 голема лажица оризов оцет
- 1 голема лажица кокосов или кафеав шеќер
- 1 лажиче чили-сос (самбал оелек, но може и срирача)
- 1/4 шолја соја-сос
- 1/2 шолја кремлив путер од кикиритки
- малку вода
Приготвување:
1. Исчистете ги ракчињата. Сварете ги нудлите според упатството, па измијте ги со ладна вода.
2. Пригответе го сосот така што ќе ги измешате сите состојки, а ќе додадете вода по потреба.
3. Пропржете ги зеленчуците, па кога ќе омекнат, ставете ги ракчињата во истата тава, додека добијат розова боја од двете страни (тоа обично е многу кратко, само неколку минути).
4. Додајте ги нудлите во истата тава, потоа и сосот и убаво измешајте за да се соединат сите состојки.
5. Послужете со ситно сечкан млад кромид, тостиран сусам и потпечени кикиритки.
Фусили со туна
Рецептите со туна секогаш се добредојдени, па уште и ако е во комбинација со тестенини – уживањето е загарантирано. Пробајте го специјалитетот на Елизабета Пешовска (@my_little_kitchen_stories)
Состојки:
- 1 пакување фусили или други тестенини по избор
- 1 главица кромид
- 3-4 чешниња лук
- 400 г доматно пире
- 1 домат
- маслиново масло
- босилек, рузмарин, жалфија или зачини по избор
- сол и црн пипер
- 1 конзерва туна
- 4 лажици маслинки
Приготвување:
1. Сварете ги фусилите во длабок сад.
2. Во тавче со маслиново масло пропржете го прво кромидот, па потоа додајте го лукот. Намалете го огнот и додајте ги доматното пире, ситно сечканиот домат и зачините.
3. Промешувајте постепено, додека згусне смесата. Доколку пирето е многу густо, може да додадете малку вода. Оставете сето тоа да се динста заедно уште 5 минути, па додајте ги фусилите.
4. Добро промешајте, па поклопете со капак и исклучете го огнот, но оставете ја тавата на рингла уште 5 минути.
5. На крајот, додајте ги туната и маслинките и внимателно промешајте. Сервирајте ги вака отстоените фусили во сосот со свеж босилек.
Коментарите се заклучени.