Вирусот на грип може да преживее на цврсти подлоги (на пр. на тастатура) од 24 до 48 часа. На марамчињата? Од 8 до 12 часа! Употребете ги еднаш и веднаш фрлете ги!
Не повторувајте ги грешките поради кои минатата година (и секоја претходно!) „закачивте“ грип и настинка. Што да правите? Подготвивме краток тест што ќе ви помогне полесно да го совладате градивото
1. Сега е доцна да се вакцинирам против грип. Точно или неточно?
Одговор: неточно! Не постои прецизно одреден рок за вакцинација. Се разбира, подобро е порано да завршите со тоа, за да изградите имунитет пред почетокот на сезоната на грип (почнува во ноември, а трае до мај). Меѓутоа, кога и да се вакцинирате – тоа е клучен фактор за заштита од зараза. Ова важи и доколку сте „прележале“ некој од вирусите – вакцината ќе ве заштити од другите.
2. Кој симптом е знак дека треба да посетите одреден лекар?
А Болки во коските и во мускулите.
Б Покачена телесна температура.
В Екстремна премаленост.
Г Сѐ горенаведено.
Одговор: под Г. Овие знаци не се типични за обична настинка, па постои веројатност дека станува збор за вирус на грип.
Основната разлика меѓу настинката и грипот е во интензитетот на симптомите: во случај на грип, тие се појавуваат нагло, за неколку часа, со висока температура, главоболка, болки во мускулите и премаленост, која го фрла пациентот во кревет.
Главна компликација во случај на грип е воспаление на белите дробови, па доколку имунитетот ви е слаб и се плашите дека организмот нема лесно да се избори со вирусот, што е можно побрзо одете на лекар.
3. Колку долго би требало да сте на боледување доколку се разболите од грип?
A Три дена.
Б 24 часа откако ќе ви се нормализира телесната температура.
В 48 часа откако ќе ви се нормализира телесната температура.
Г Додека се почувствувате комплетно здраво.
Одговор: под Б. Ако добиете висока температура (не им се случува на сите), почекајте да се нормализира и да остане така најмалку 24 часа без употреба на лекови против температура, пред да се вратите на работа.
Доколку кашлате, ве боли грлото и чувствувате слабост во целото тело, иако вашата температура не е повисока од 37 степени, препорака е да не одите на работа следните шест дена за да не ги заразите колегите.
Ако не можете да отсуствувате толку долго, преземете превентивни мерки за да ги заштитите преостанатите: подотворете го прозорецот, избегнувајте контакт со другите, почесто мијте ги рацете и дезинфицирајте ги површините што ги допирате.
4. Кој е најдобар метод да се отстранат вирусите од рацете?
А Сапун и вода.
Б Средство за дезинфекција на рацете на база на алкохол.
В Средство за дезинфекција на рацете што не е на база на алкохол.
Г Сѐ горенаведено.
Одговор: под A и Б. Водата и сапунот одлично ги отстрануваат вирусите од рацете, но треба да ги триете барем 20 секунди. Но ако се брзате – не грижете се, и средството за дезинфекција со 60-95% алкохол ќе убие 99,9% од бактериите.
Текст: Убавина и здравје
Фото: Getty Images