Чек-листа на музичарот Ris Flower: Слушнете, погледнете, прочитајте!
Во слободно време
Топ-предлози на Борис Цветановски (Ris Flower) што ќе ви го збогатат секојдневјето
Во слободно време музичарот Борис Цветановски, попознат како Ris Flower (@ris.flower), освен што постојано слуша музика, сака да гледа филмови и да чита книги што го мотивираат и инспирираат. Слушнете, погледнете, прочитајте!
МУЗИЧКО ВМРЕЖУВАЊЕ
Можноста да ги имаш сите песни со квалитетни снимки со само еден клик на мобилниот телефон е фантастична. Затоа го сакам Spotify. Тука се наоѓаат и моите песни, па можам да ги споделувам и да дискутирам за нив со моите пријатели музичари од целиот свет, како и да ги слушам нивните нови песни.
ВО ЕДЕН ЗДИВ
Доколку не знаете која ТВ-серија да ја почнете следна, мојата омилена е „Калифорникација“. Духовита драма што се гледа во еден здив. Но ако не сакате да се „врзувате“ за нешто што одзема повеќе време, а сакате да се расположите, емисијата „Вечерно шоу“ на Џими Фалон секогаш е добар избор.
ОМИЛЕНО ПАРЧЕ МУЗИКА
Бидејќи цело време слушам музика, можам да кажам дека она што ми е „омилено“ се менува на периоди. Во моментов омилено парче музика ми е новиот албум на Стинг, The Bridge, но ми се допаѓа и целиот негов опус. А песна што најмногу ја слушам периодов е Thinking of You на Лени Кравиц.
ДИГИТАЛЕН ДЕТОКС
Поврзани објави
Сакам да читам, бидејќи тогаш нема ни екрани ни нотификации. Наоѓам инспирација во светот на буквите. Кога ми се допаѓа некоја книга, можам да ѝ се навраќам и да ја препрочитувам неколкупати. Таква книга за мене е „Оркански височини“ од Емили Бронте. Им ја препорачувам на сите!
ОСЛОБОДЕТЕ СИ ГО УМОТ
Првиот дел на „Матрикс“ од 1999 е мојот омилен филм. Ме мотивира во секојдневниот живот со силните пораки, а дел од најмоќните фрази се:
1. „Ослободи го умот“.
2. „Нештата не се реални, умот ги прави реални“.
3. „Спознај ја разликата помеѓу твоето ропско име и твојот вистински идентитет“. И уште многу други…
А наш предлог е да ја слушнете последната песна на Ris Flower, Flying to Berlin. Уживајте!
Разговарала: Марија Лукаревска
ФОТО: АНИ ДИМИ, Ranjitsinh Rathod/iStock, Theo Wargo/Staff/Andrew Toth/Stringer/Getty Entertainment via GETTY IMAGES, ИНТЕРНЕТ