Секоја авантура почнува во ДАБЛИН: Бојан Гиевски ни ги пренесе своите впечатоци од патувањето во Република Ирска!

Сите искуства и претходни патувања не се комплетни додека не го посетите Даблин!

„Град богат со историја, култура и посебни приказни. Сега конечно сфаќам зошто сите кои биле во Ирска, толку многу се вљубени во овој мал смарагден остров“, вели Бојан Гиевски (@gievskibjn), кој ни ги пренесе своите впечатоциод Република Ирска.

ВРЗЕТЕ СЕ, ПОАЃАМЕ!

Бојан ни призна дека му било многу тешко да го организира ова патување, целиот процес изискувал голема истрајност и посветеност, особено поради прекумерната документација што е потребна за добивање ирска виза. Тој патувал со авион до Истанбул, па летал уште 5 часа до Даблин, но кога конечно стигнал, заборавил на сè. Добро е да се знае дека Даблин важи за еден од поскапите градови во Европа, каде што цената на бургер и кригла пиво почнува од 30 евра па нагоре, а сместувањето чини околу 100 евра од вечер.

Од едно место на друго

Даблин има многу опции за јавен превоз, а Бојан препорачува да се користи комбинација од автобус и такси-превоз. „Автобусот веројатно е најдобрата опција за движење низ Даблин, бидејќи не само што е финансиски исплатлив туку и има неколку различни превозници, па опциите се многубројни. Сепак, мојата омилена опција е одењето пеш, бидејќи така можете да видите најмногу работи. Даблин е релативно рамен град, па одличен е за пешачење и разгледување“, открива Бојан, а додава и дека возот е одличен избор доколку сакате да истражувате надвор од границите на градот.

МАЛАХАЈД

Иако генерално бил стациониран во Даблин, Бојан успеал да го посети и местото Малахајд, кое се наоѓа на самиот брег на Ирското Море. „Станува збор за богата крајбрежна населба сместена 14 километри северно од Даблин, позната по еден од најубавите ирски замоци – замокот Малахајд, кој датира од 12. век. Ова место изобилува со пространи паркови, терени за крикет и долги песочни плажи за релаксирани прошетки“, опишува нашиот соговорник.

Замок на духови?

Дали знаете дека замокот во Малахајд се смета за еден од најопседнатите замоци во Ирска? Оние што живееле и работеле во него, па дури и посетителите, имаат потврдено дека забележале чудни нешта додека биле внатре. Еден од најпознатите духови кој наводно живее во замокот е Дамата во бело…

ЗА СЕКОГО ПО НЕШТО

Даблин, главниот град на Република Ирска, е исполнет со културни знаменитости, музеи, пабови, продавници и уште многу други нешта што можете да ги истражите за време на посетата на овој магичен град, а Бојан ни ги издвои неговите омилени:

• Барот „Темпл“ – Толку е познат што целата населба е именувана по него! Уморните патници од целиот свет доаѓаат овде за да уживаат во одличната атмосфера и да се релаксираат со кригла ирско пиво или чаша ирско виски! Но внимавајте – ова е еден од најскапите барови во Европа!
• Магацинот „Гинис“ – Дури и да не сте љубители на пивото, мора да ја посетите куќата на пивото кога веќе сте во Даблин! „Дури и ако не можете да го поднесете вкусот на темното пиво, топло ви препорачувам да го пробате уште еднаш во Даблин. Музејот изобилува со разновидни содржи сместени на 6 ката, надополнети со бар на покривот, од каде што можете да уживате во погледот на целиот Даблин!“

• Замокот Даблин – Кога ѕидовите би можеле да зборуваат, замислете што сè би имале да кажат 800 години старите ѕидини на замокот во Даблин. Се простира на површина од 11 хектари и е нешто што задолжително мора да го посетите.

НЕШТО ВКУСНО

Кога ќе се спомене ирската кујна, повеќето луѓе мислат на говедско месо со зелка или на познатиот ирски леб со сода, но вистината е дека ирската кујна има да понуди многу повеќе од тоа:

• Boxty – Уникатна ирска палачинка од компири. Вообичаено се пржи на тава и се служи како традиционален ирски појадок.
• Colcannon – Комбинација на пире од компири и кељ или зелка. По желба, се зачинува со малку путер, млеко, сол и црн пипер.
• Barmbrack – Сладок ирски леб направен со парчиња суво грозје, кој е многу популарен за време на Ноќта на вештерките. Според традицијата, во тестото се додаваат монети или прстени, а се верува дека оној што ќе го најде скриениот предмет, ќе има среќа цела година – нешто слично како нашата традиција за Бадник.

СОВЕТ ПЛУС

Уште неколку работи што треба да ги знаете пред да отпатувате во земјата на впечатливи замоци, прекрасни пејзажи и бескрајни количини пиво:

1. Ирска е поделена на два дела: Република Ирска и Северна Ирска. Република Ирска е независна држава и национална валута е еврото, но ако сакате да ја посетите Северна Ирска, ќе ви требаат фунти, бидејќи таа територија сè уште е дел од Обединетото Кралство.

2. Задолжително понесете мантил за дожд и водоотпорни чевли – Ирска е позната по непредвидливото време.

3. И покрај тоа што Ирците имаат тешко разбирлив акцент, не грижете се, бидејќи речиси секој зборува англиски.

Подготвила: Марија Лукаревска

ФОТО: ПРИВАТНА АРХИВА

Жените сакаат СОЛО-ПАТУВАЊА: Пример за тоа е Диана Кишишева која има посетено повеќе од 40 држави!