Во кујната на Дејв: Дознајте како нашиот познат блогер за храна го уредил неговото омилено катче во домот!

Неговата кулинарска приказна започнува во петто одделение кога подготвил француски палачинки. Оттогаш, секогаш кога имале гости дома, токму тој бил задолжен за десертот. Јавноста го запознава пред 8 години преку неговите страници на социјалните мрежи Фејсбук и Инстаграм, каде што е популарен под името Dave’s Kitchen. Денес, тој има споделено илјадници рецепти онлајн, го следат повеќе од 80.000 љубители на добрата храна, има издадено два готвачи, а неговата пасија за готвење никогаш не спласнува, напротив станува сѐ поголема.

Секогаш има за што да се зборува со Давор Панчевски и редовно ги полниме нашите гастро-страници со неговите специјалитети, но најголемиот повод за разговор овој пат е неговата нова кујна! Познатиот блогер за храна ни откри како изгледал процесот на уредување и што влијаело врз неговиот избор на елементи и бои, а неговите совети несомнено ќе ви бидат корисни, особено ако планирате да го реновирате ова катче во домот.

Спој на рустикално и модерно

Давор веќе ја имал во глава идејата за тоа каква кујна посакува и знаел дека изборот ќе падне на „Икеа“: „Процесот на уредување и набавка траеше неколку месеци, и тоа од две држави – Србија и Грција. Сам се погрижив за уредувањето и склопот на елементите, а персоналот од ’Икеа’ беше доволно љубезен за да ми помогне да го направиме списокот за набавка на потребните производи, со цел да ја реализирам мојата идеја.“

Сакал темна кујна, стакло и светол гранит како работна површина – совршен спој на елегантни, рустикални и модерни детали. „Она што отсекогаш го имав како замисла е светло во висечките елементи над ѕидните плочки. Дрвените вратички со стакло овозможуваат тоа визуелно да се долови“, објаснува Давор.

Покрај црната боја, суптилно се провлекува и златната боја во делот околу чешмата и рачките на вратичките и фиоките. И секако, работната површина е тронот во кујната на еден страстен љубител на готвењето: „Островот за работа беше задолжителен при планирањето на кујната. Под работната површина на островот има три елемента, каде што ги чувам најчесто користените алатки: чинии за сервирање, садови за матење, шпатули, дрвени лажици…“

Естетика VS практичност

Кујната треба да изгледа естетски убаво, но поважно е да биде практична. Го прашавме Давор како да се исполнат и двата услова: „Модерната кујна не треба да се натрупува со премногу работи. Исто, доволно е да доминираат две бои кои ќе ја одредат естетиката на кујната. Од досегашното искуство, сфатив дека најпрактична е кујната што располага со што повеќе фиоки, наместо вратички во долниот дел. Доколку е изводливо, секогаш препорачувам фиоки за подобра прегледност и уредување на кујнските апарати.“

Тој ни сподели уште неколку совети што би ви помогнале при уредувањето на кујната:

1. Во кујната секогаш треба да влегува природна светлина, доколку тоа е возможно според распоредот на домот.

2. Оставете поголем простор за работа – така полесно ќе можете да приготвувате вкусни рецепти.

3. Практичноста на „Икеа“ е одлична за реновирање, бидејќи лесно можете да го промените целиот изглед на кујната, без да потрошите многу пари.

4. Набавете само вратички и механизми на постоечките елементи и ќе ѝ дадете нов, модерен и естетски изглед на вашата кујна.

Трикови за чиста и средена кујна

Готвењето е забавно, но знае да биде и хаотично. Понекогаш средувањето на кујната по некој кулинарски експеримент може да одземе повеќе време и од самиот процес на приготвување, па сигурно се прашувате како на некои луѓе им успева да ја одржат оваа просторија секогаш чиста и средена. Нѐ интересираше дали Давор е од оние што прават неред кујната или, пак, е педантен по тоа прашање? „Кујната е мојот простор за работа и сакам секогаш да биде чист и уреден. При уредувањето на станот, најголем акцент ставив на кујната и за мене, таа е најважната просторија во домот. Со добар план, сметам дека лесно може да се организира готвењето без да се направи посебен неред. Многу полесно е да се исчисти неред од само еден рецепт отколку од десет што се приготвувале во текот на една недела.“

Покрај добрата организација, и деталите даваат свој придонес за чист и среден изглед на кујната: „Често знам да го освежам изгледот на кујната со свежо цвеќе. Не само што ѝ дава посебен изглед, туку и позитивно влијае врз расположението во домот“, советува Давор.

Тој ни откри и кое било првото јадење со кое направил „неред“ во новата кујната: „Првиот рецепт беше тортата Мики Маус. Рецептот сѐ уште не е споделен на социјалните мрежи, но ветувам дека наскоро ќе го направам тоа. Покрај оваа торта, приготвив и многу брзи вкусни идеи за појадок со тортилји, потпечени сендвичи и брзи торти без печење“, набројува тој, а ние со нетрпение чекаме да ги испробаме сите овие вкусни деликатеси.

Готвењето продолжува…

Давор секогаш е расположен за готвење, ние (а сигурно и вие) секогаш сме расположени за дегустирање – па сакавме да знаеме што можеме да очекуваме следно од новата кујна на Дејв: „Наскоро следи бура од превкусни рецепти кои, пред сѐ, ќе бидат практични и лесни за приготвување. Сѐ уште не сум го дефинирал планот како ќе се одвива целиот процес, но планирам готвење во живо на Инстаграм, нови Reel видеа и полека го подготвувам третиот готвач, кој би требало да излезе во продажба кон крајот на оваа година.“ 

Десерт што ќе ве одведе во Италија: Сицилијански каноли