Бидете сити и вити со „Добра храна“!
Сончевите зраци конечно ги пробија тмурните облаци и нè разбудија од зимскиот сон. Напролет сè е некако полесно: стануваме поенергични, со леснотија ги извршуваме сите обврски и со задоволство ги прифаќаме промените и предизвиците. Па, така, и храната што ја приготвуваме станува полесна.
Тешките оброци ги заменуваме со салати и лесна храна, а овошјето станува задолжителен дел од нашите десерти. Пролетта ни нуди вистинско изобилство од здрави и вкусни производи, кои ненаметливо си го наоѓаат својот влез во сечија кујна.
Во април ѝ се радуваме и на богатата велигденска трпеза, за која доколку сè уште немате идеја што да приготвите, ние ви ја нудиме потребната инспирација. Воодушевете ги вашите најблиски со креативни велигденски декорации, но и со новите техники на бојосување јајца.
Повторно со нас се и нашите гастро-мајстори, од чии оригинални рецепти никогаш не ни е доста.
Да уживаме заедно во готвењето и во вкусот на пролетта со вториот број на „Добра храна“!
Ваша Марија Лукаревска,
Главна и одговорна уредничка