КОРНЕТИ СО ЦЕЛЕР – одличен вкус, добра финта!
Не чекајте ги празниците за да приготвите нешто убаво и вкусно. Оваа лесна салата ќе ве освои со вкусот и изгледот! Пробајте ја!
Состојки:
250 г лиснато тесто
околу 300 г корен од целер
200 г павлака
сок од лимон по вкус
сол и бибер по вкус
1 јајце, за премачкување
сусам за посипување
магдонос по вкус
ПРИГОТВУВАЊЕ:
Доколку немате соодветни калапи, направете картонски фишеци и обложете ги со алуминиумска фолија.
Лиснатото тесто развлечете го тенко и исечете го со тркалце на ленти широки 1-1,5 см.
Почнете од врвот и навиткајте ги лентите на калапите така што малку да се преклопуваат. Тестото не мора да се витка докрај, нека бидат мали корнетите.
Наредете ги корнетите на плех и премачкајте ги со изматено јајце. Посипете ги со сусам или ким и печете ги околу 15 минути на 220 степени.
Испечените корнети внимателно извадете ги од калапот и оставете да се изладат. Излупениот целер изрендајте го што поситно. Веднаш посипете го со сок од лимон за да не потемни, а потоа додајте павлака, сол и бибер по вкус. Измешајте сè и наполнете ги корнетите. Посипете ги со сечкан магдонос.
Текст: Добра храна
Фото: Printscreen Youtube