„До крајот на животот сакам да…“ Дали ви е потребен список на желби?

Сите сонуваме за работите што сакаме да ги направиме пред да ни истече времето. Не „пред да умреме“, но сепак постои одредено чувство на итност. Создавањето и ажурирањето на списокот на она што се надеваме дека ќе го видиме или правиме нè одржува во контакт со она што го сметаме за важно, трогателно и инспиративно.

Оваа листа ги поддржува нашите соништа, нè мотивира и нè поттикнува да работиме напорно, а тоа ни помага да останеме свесни за тоа што ја имаме шансата да го живееме животот. Идеите за списокот може да бидат големи или многу едноставни… но и соодветни на тоа кои сте и за што се грижите. Идејата е едноставна: замислете, запишете и направете.

Меѓутоа, можеби нема да ви биде многу лесно. На крајот на краиштата, за саморефлексија е потребно време – ресурс што најмногу ни недостига деновиве. Ние сме тука за да ви олесниме да почнете.

ПРИДОБИВКИ ОД ПРАВЕЊЕТО СПИСОК

Се работи за забавен метод за планирање на животот, кој може да вклучи професионални и лични цели или сè друго што можете да замислите. Вашиот список на желби несомнено ќе се разликува од оној на членот на вашето семејство, пријателот или колегата – и тоа е во ред. Треба да го одразува она што го цените и сакате. Дали секој треба да има свој список? Можеби не, зависи од вас и од тоа како ќе го достигнете вашето лично чувство на исполнетост. Еве неколку работи што треба да ги земете предвид при неговото креирање.

ОВА СЕ НЕГОВИТЕ ПРЕДНОСТИ

1. Мерлива форма на напредок. Списокот на желби и задачи служи како патоказ што можете да го следите и кој ќе ви помогне да останете на вистинскиот пат, а тоа ќе ви ги одреди приоритетите и, што е најважно, буџетот за вашите соништа.

2. Ви дава работи на кои ќе им се радувате. Надежта е моќна, а правењето список им дава на луѓето причина да гледаат кон деновите што допрва доаѓаат. Овие цели се исто така одлични надворешни мотиватори – нешто што треба да го вклучите во вашиот личен систем на награди.

3. Го прави животот позначаен. Овие списоци ни помагаат да видиме поголеми и подобри нешта зад монотонијата на секојдневниот живот. Животот постои надвор од нашите книги со кои се усовршуваме професионално, надвор од канцелариските простории. А списокот нè охрабрува да ги бараме овие нови искуства, да имаме можност да се занимаваме со светот и со себе, надвор од нашиот секојдневен живот.

4. Ви помага да не се обесхрабрите. Ако се чувствувате немотивирано и некако опуштено, можеби ќе бидете заглавени во некоја фаза од животот. Создавањето список на желби е нешто на што треба да му се радуваме – бидејќи носи возбуда за животот што ни претстои утре.

ПОСТОЈАТ И НЕДОСТАТОЦИ

Недостатоците од креирањето список на желби и задачи се следните:

1. Исполнувањето е минливо. За жал, повеќето од искуствата што луѓето ги имаат во своите списоци се привремени. Искуството, иако фантастично во моментот, брзо поминува, брзо станува спомен.

2. „Функционира“ само за оние кои наоѓаат смисла во постигнувањето на она што го наумиле. Поминувањето повеќе време со семејството и стабилната работа се доволно за многумина, но некои луѓе се сонувачи со дополнителни цели. Овој тип мечтаење е особено важен за младите луѓе, кои го имаат целиот живот пред себе, а поставувањето цели ќе им помогне да најдат свој начин на нивно исполнување.

3. Можно е да се чувствувате неуспешни. Ако не сте прецртале нешто од вашата листа или не сте доживеале нешто до одредена возраст, тоа може да доведе да почнете да се сомневате во себе или да се чувствувате неуспешно. Неостварувањето на соништата ја нарушува нашата самодоверба.

4. Може да биде површен и перформативен. Некои луѓе сакаат да зборуваат за своите списоци, што може да ги натера другите да се чувствуваат загрозено. Исто така, може да нè поттикне да се фокусираме на големи искуства, а не на подлабоките, потивки секојдневни искуства кои создаваат задоволство и смисла во животот.

Како да креирате свој список на желби? Вклучете сè што ви се допаѓа. Наведете ги целите во кариерата, дестинациите за патување, здравствените, финансиските или целите на врската. Може да биде онолку долг колку што сакате. Навистина, ако можете да го сонувате, можете и да го постигнете тоа. Создавањето своја сопствена листа може да биде огромно искуство на саморефлексија и поврзување со личните вредности.

СОНУВАЈТЕ!

Вашиот список може да биде многу долг ако се обидете да наведете сè одеднаш. Размислете за вашата моментална кариера, страстите и хобито и претворете ги во одлични идеи за списокот. Од нашите пријатели и колеги побаравме идеи од нивните списоци. Еве неколку предлози што треба да ги земете предвид:

1. Посетете едно од седумте светски чуда – страхопочитта инспирирана од природната убавина и пространоста на природата има силно влијание врз нашата благосостојба.

2. Пробајте улична храна во Мексико (или во која било друга земја каде што уличната сцена изгледа егзотично во споредба со вашето секојдневие).

3. Одете на повеќедневно патување со воз со вагони за спиење.

4. Пијте пиво во Германија на Октоберфест.

5. Одете на кампување.

6.  Отпатувајте за да ја видите поларната светлина.

7. Исклучете се од технологијата десет дена.

8. Посетете го Њујорк за време на култните настани како што се Парада на гордоста или Ноќта на вештерките.

9. Пробајте стек од ајкула во Исланд.

11. Пешачете до Мачу Пикчу во Перу.

12. Посетете ги песочните плажи на Хаваи, Галапагос, Индонезија или Мртво Море.

13. Веслајте на кајак надолу по брзаците.

14. Возете се на гондола во Венеција. 15. Конечно најдете работа што ја сакате.

16. Предвремено пензионирајте се.

17. Посетете го Токио.

18. Имајте дете.

19. Одете на нуркање.

20. Бидете вегетаријанец еден месец.

21. Прошетајте по Кинескиот ѕид.

22. Направете оброк од храна целосно одгледувана во вашата градина.

23. Заштедете за образованието на вашите деца.

24. Ослободете се од сите долгови.

25. Дошколувајте се.

26. Посетете најмалку шест од седумте континенти.

27. Посвојте домашно милениче.

28. Обидете се да скокнете со падобран.

29. Напишете книга.

30. Бидете статист во филм.

31. Купете стан или куќа.

32. Преселете се во странство.

33. Пливајте во сите четири океани.

34. Настапете на локална караоке-забава.

35. Научете да возите скиборд.

36. Купете билет за натпревар на Олимписките игри.

37. Јадете во заливот Ха Лонг, Виетнам.

38. Пробајте зиплајн.

39. Бидете му ментор на млад колега.

40. Кампувајте во пустина.

41. Истрчајте маратон.

42. Снимете музички албум.

43. Прочитајте ги сите книги на вашиот омилен автор.

44. Искусете рафтинг.

45. Купете спортски автомобил или мотоцикл.

46. ​​Основајте фонд за стипендии на ваше име.

47. Напишете сценарио.

48. Совладајте комплициран рецепт и згответе го за вашите пријатели.

49. Спијте во леден хотел.

50. Одгледајте претстава на Бродвеј.

А ПОТОА РЕАЛИЗАЦИЈА

Дали сте подготвени да започнете да ги реализирате вашите желби од списокот? Првиот чекор е да ги запишете во дневник со што стануваат „пореални“. Нема правила за дневникот, па можете да го организирате како што сакате, но еве неколку предлози. Дневник за благодарност. Создадете место за размислување за посебните работи што сте ги направиле досега. Ова ќе биде одлична мотивација да продолжите да работите на вашиот список!

Дневник на идеи. Место каде што ќе ги зачувате вашите најдобри соништа и идеи. Обидете се да не ги филтрирате – небото ви е граница! Дневен дневник. Користете ја вашата тетратка за да поставите дневни цели, да размислувате за секојдневните искуства и да ги документирате вашите авантури. Ова ќе ви помогне да откриете кои активности ви се најважни. Дневник на визи.

Наместо да ја запишете, зошто да не ја визуелизирате вашата листа? Наведете сè што сакате да направите. Ако пенкалото и хартијата не се ваш стил, можете да креирате табела на Ексел. Уште подобро, креирајте профил на bucketlist.org или bucketlist.net. Со регистрирање, ќе добиете пристап до приспособливи списоци и алатки за следење на целите. Покрај тоа, можете да се поврзете со другите заинтересирани луѓе онлајн и да се инспирирате од нивните достигнувања. Еден ден ќе се разбудите и, за жал, нема да имате повеќе време за работите што отсекогаш сте сакале да ги правите.

Затоа направете го тоа сега бидејќи според една студија од 2018 година, просечно вработено лице троши 25% од својот живот работејќи. Но, што ќе правиме со останатите 75% од нашите животи зависи од нас. Важно е да одвоите време за уживање во она што светот го нуди, да стекнете нови пријатели, да ги почитувате (и да создадете нови) семејни традиции и да создавате спомени. Без разлика дали сакате да направите список за патување во Шпанија или да им дадете приоритет на семејството и кариерата, никогаш не е доцна да почнете да ги следите вашите соништа и да ѝ дадете приоритет на вашата емоционална благосостојба.

Светот може да биде огромно, дури и застрашувачко место, но вие сте способни за сè што ќе замислите. Сега, кога го создадовте вашиот список на желби, време е да излезете надвор и да почнете да ги правите тие амбиции реалност – дури и ако се надвор од вашата зона на удобност – затоа што така ќе растете.

Ако сте преоптоварени од работите што сакате да ги правите, обидете се да ги разделите во категории. Еве неколку примери на категориите во вашиот список на желби: 1. Патувачки дестинации 2. Цели во кариерата 3. Вештини или хоби што би сакале да ги совладате 4. Животни цели 5. Стравови што треба да ги надминете.

Текст: Наташа Човиновска