Кои кучиња се терапевтски и помагаат во процесот на оздравување на човекот?

Психотерапија со помош на животни (ААТ) е третман во кој давателите на услуги од областа на менталното здравје ја користат врската човек-животно за да предизвикаат позитивни промена кај нивните клиенти и да им помогнат во процесот на оздравување.

Клиентите можат брзо да изградат доверба, социјални вештини и самодоверба кога терапевтско животно е вклучено во нивниот третман. Врската меѓу луѓето и животните обезбедува, пред сè, социјална, емоционална и физиолошка благосостојба на луѓето. Студиите покажуваат зголемено ниво на окситоцин и допамин и кај кучињата и кај луѓето откако поминале време заедно. Овие невротрансмитери се мозочни супстанции – хормони на среќата, кои создаваат чувства на топлина, наклонетост и доверба.

Луѓето, исто така, доживеале значително намалување на крвниот притисок и нивото на кортизол, кој е примарен хормон на стрес во телото, по интеракција со кучиња. Овој доказ го поддржува она што секој сопственик на домашно милениче веќе го знае: нашите односи со миленичиња и други пријателски животни ни помагаат да се чувствуваме сакано, опуштено и безбедно.

Кои кучиња се терапевтски

Такви се кучиња од широк спектар на раси, од ситни чивави до џиновски мастифи и сите големини и раси меѓу нив. Тие се погодни за работа ако не се бучни, ако се мили и пријателски настроени и успешно поминале официјална оценка за послушност и темперамент и изгледаат среќни кога комуницираат со клиентите. Терапевтите обично ги тренираат своите кучиња неколку години и волонтираат со нив во училиштата, книжарниците и болниците за да ги подготват да работат како асистенти за терапија.

Активностите за психотерапија со помош на животни често вклучуваат физичко движење и секогаш ги поддржуваат персонализираните цели за третман на клиентот. На пример, ако ви е дијагностициран АДХД и се борите со немир и со слаби вештини за организациско планирање, би можеле да потрошите дел од вашата терапија учејќи го вашето куче нов трик.

Оваа ангажирана активност обезбедува здрав излез за вишокот енергија додека ја подобрува вашата способност да разделите сложена задача на нејзините помали делови. Кога го учиме кучето да врти или скока пречки, увежбуваме последователни вештини, како што се организирање и завршување на задачите по логичен редослед.

Слично на тоа, ако ви е дијагностицирано депресивно растројство и се борите со апатија, може да поминете дел од вашата сесија носејќи го вашето терапевтско куче на кратка прошетка за да го поттикнете однесувањето насочено кон целта, да ја зголемите упорноста на задачите и да ги зголемите нивоата на физичка активност. Сето ова промовира закрепнување од депресија.

Активностите со помош на животни може да бидат корисен додаток на традиционалната психотерапија, но тие не се погодни за секого.

3 клучни фактори

Постојат 3 фактори што ќе ви помогнат да одлучите дали терапијата со животни може да ви помогне да ги постигнете вашите цели.

• ААТ може да биде соодветна за вас ако уживате во интеракција со пријателски расположени кучиња, немате ништо против кучешки влакна на облеката, немате страв да ги допирате кучињата, се грижите за нив и уживате во интеракција со нив.
• Веројатно ќе бидете добар кандидат ако сте во добро физичко здравје и немате алергии на кучешки плунка или влакна. Од друга страна, можеби не сте добар кандидат ако се плашите од кучиња, не сакате животни или сметате дека чувањето милениче е нехигиенски. Треба да се консултирате со вашиот лекар пред да користите ААТ ако сте алергични на животни, медицински чувствителни или чувствителни на зоонозни болести кои се пренесуваат од кучиња на луѓе.-
• Конечно, AAТ е несоодветна ако сте злоупотребувале животни или луѓе во минатото и сè уште немате сигурна контрола врз вашите импулси и однесување. Претходната злоупотреба на животни или луѓе не ја дисквалификува личноста трајно, но од клучно значење е да му кажете на вашиот терапевт за тој дел од вашата животна историја.

Терапевтот и клиентот заеднички одлучуваат дали и кога ААТ ќе биде од помош за неговиот личен раст и закрепнување. Активностите во терапија со помош на животни често вклучуваат одредена физичка активност, но тоа не е апсолутно неопходно; некои AAТ-сесии не вклучуваат ништо понапорно од галење пријателско куче.

Во зависност од потребите и преференциите, клиентите можат да добијат можност да се грижат за кучето, да си играат со него, да го тренираат или да го прошетаат. Секоја активност со кучето е дизајнирана да биде катализатор и да ја олесни работата со терапевтот и да го поттикне постигнувањето на целите на третманот.

На пример, ако некој бил малтретиран или запоставен како дете, тој може да се вклучи во галење куче додека ги опишува своите мисли и чувства за тие искуства. Исто така, тој може да размислува за неговите рутини на грижа за себе и да утврди како неговите сегашни навики всушност се обликувани од искуствата од грижата за неговите потреби во детството.

Текст: Лидија Ќулибрк