Како да се затегнат мускулите на нозете: Одговори побаравме од фитнес-инструкторката Билјана Ристовски

Честа заблуда е тоа дека со трчање ќе ги ослабите и затегнете нозете. Кардиовежбите се одлични за согорување калории и секој треба да ги има во својата фитнес-рутина, но не се алатка за затегнување на мускулатурата. Тоа го потврдува и инструкторката Билјана Ристовски (@ristby), која открива дека вежбите со тегови се идеални за да се стимулира мускулен раст: „Најдобри резултати се постигнуваат доколку вклучите вежби со тегови. Кардиовежби со низок интензитет се вметнуваат од 2 до 4 пати неделно, во зависност од вашата цел“. Покрај истрајност и упорност, дознајте што уште ви треба за да ја постигнете посакуваната форма…

Може ли нозете да ви станат премногу мускулести ако вежбате со тегови?

„Доминантен хормон во женското тело е естрогенот, па речиси невозможно е за жените премногу да се набилдаат, освен ако не посегнат по анаболици. Единствената опасност од тренингот со тегови е да се вљубите во овие вежби и целосно да го промените вашиот животен стил!“, охрабрува Билјана.

Дознавме и каде грешат девојките што никако не можат да ги истанчат нозете колку и да вежбаат: „Истанчувањето на нозете зависи од две работи: генетиката и процентот на телесни масти. Некои девојки се посклони на таложење масти на нозете, но решението е универзално за сите: да се намалат телесните масти, а тоа може да се постигне само со правилна исхрана. Не постојат специјални вежби за истанчување на листовите“, заклучува инструкторката.

Три топ-вежби за нозе

1 КЛЕКНУВАЊА. Сите сме ја правеле оваа вежба уште во основно училиште, а се препорачува за сите возрасти. За клекнувањето, најважно е да не ги подигнувате петиците од подот и да го туркате задникот наназад, како да седнувате на ниско столче. Задникот треба да ви биде малку под нивото на колената и треба да се задржите во таа поза неколку секунди, па потоа да се исправите. Оваа вежба можете да ја правите со тегови или без нив.

2 ИСЧЕКОР ВО ДВИЖЕЊЕ. Станува збор за варијација на статичниот исчекор. Наместо да се вратите во место откако ќе направите исчекор со едната нога, придвижете се нанапред така што ќе направите исчекор со другата нога. Повторете го ова движење повеќепати и резултатите ќе бидат неизбежни!

3 БУГАРСКИ ИСЧЕКОР. Застанете во позиција на исчекор со едната нога напред, стегнете ги торзото и колковите и поставете го стапалото на задната нога на клупа (или стабилно столче). Вашата предна нога треба да биде околу половина метар оддалечена од клупата. Спуштајте се надолу додека вашиот преден бут не дојде до хоризонтална положба, така што коленото ќе ви биде во линија со стапалото. Можете да користите и тегчиња при изведување на вежбата за поголем ефект.

Разговарала: Марија Лукаревска

ФОТО: ПРИВАТНА АРХИВА, UNDREY/SOLAR22/GETTY IMAGES VIA GULIVER

Фитнес-експертка одговара на прашањето: Зошто најтешко се симнува вишокот од стомакот?