Фитнес-експертка одговара на прашањето: Зошто најтешко се симнува вишокот од стомакот?

Бидете вити и здрави

На нашите прашања одговори Симона Ристовска, лиценцирана персонална тренерка @simona_ristovska

Многу жени се жалат дека иако редовно вежбаат и внимаваат на исхраната, сепак не успеваат да ги отстранат масните наслаги од стомакот. Каде грешат? „Стомакот содржи голем број масни клетки, кои не реагираат брзо во процесот на слабеење. Често се мисли дека со стомачните вежби ќе се намали вишокот килограми во тој предел. Сепак, подуениот, опуштениот и испакнатиот мал стомак се резултат на храната што ја внесуваме“, открива фитнес-инструкторката Симона Ристовска.

Па, доколку го прескокнувате појадокот, се прејадувате, не спиете доволно и очекувате пребрзи резултати, големи се шансите дека нема да постигнете рамен стомак. Балансираната исхрана и доволното количество течности се задолжителни, а Симона ни сподели уште неколку важни совети…

Најголемите непријатели на рамниот стомак

Одбегнувајте газирани пијалаци, брза и солена храна, преработени јаглехидрати и бели печива. Симона ни даде предлог за дневно мени составено од балансирани оброци:

  • Појадок – варени јајца, авокадо, домат и тонус-леб.
  • Ужина – интегрална тортилја со путер од кикиритки, банана, неколку бадеми.
  • Ручек – пилешки стек, варени моркови, брокула и зелена салата.
  • Вечера – салата од туна, пченка, црвен грав и зелена салата.

Доколку се придржувате до соодветен план за тренинг и исхрана, за два месеца ќе забележите разлика. Идеално е да се вежба 3-4 пати неделно, по 40-60 минути, а тренингот треба да содржи тежински и кардиовежби. „Фитнесот треба да ви стане начин на живот, а не ’кампања’ што ќе трае само неколку месеци“, завршува Симона.

За челичен стомак!

Симона ни предложи три вежби за зацврстување на стомачните мускули, кои можете да ги изведувате и во домашни услови.

1 ПОДИГНУВАЊЕ НА НОЗЕТЕ. Со оваа вежба се зацврстува долниот дел на стомакот. Легнете на под со испружени и споени нозе. Држете ги нозете прави и подигнувајте ги нагоре, додека го одлепите задникот од подот. Полека спуштајте ги нозете надолу, речиси до подот, и задржете ги така за момент. Потоа повторете го истото движење.

2 РУСКИ ТВИСТ. Оваа вежба е наменета за страничните мускули на стомакот. Седнете со свиткани колена и со стапалата над подот, без да го допирате. Навалете се малку наназад, држејќи го ’рбетниот столб исправено. Издишувајте додека се вртите налево, вдишете во средина, па повторно издишете вртејќи се надесно.

3 „ПЛАНК“ (ШТИЦА). Со оваа вежба за издржливост се зајакнува целото тело, стомачните мускули, мускулите на колкот и задникот, кои се ангажирани во текот на целата вежба.

Подготвила: Марија Лукаревска

ФОТО: GETTY IMAGES, ДАРКО КОЦЕВ

Дали секој може да вежба кросфит? Побаравме стручно мислење од наша фитнес-инструкторка!
Прочитајте и
Оставете одговор

Вашата мејл-адреса нема да биде прикажана.

Ви благодариме за коментарот!

This site uses Akismet to reduce spam. Learn how your comment data is processed.