11 видови намирници што содржат цинк: Минерал што го зајакнува имунитетот и нè штити од разни болести
Обрнете внимание на исхраната
Цинкот е минерал што најмногу му помага на телото да го зајакне имунитетот и да се избори со вирусите и настинките
Цинкот е исклучително важен минерал, поради своите антиоксидативни својства што помагаат да се зајакне имунитетот. Присутен е во сите органи, а најмногу го има во еритроцитите (црвените крвни зрнца), коските, мускулите, црниот дроб и во простатата кај мажите. Цинкот, по железото, е вториот најзастапен елемент во траги во човечкото тело.
За разлика од некои материи, телото не може да го складира цинкот, што значи дека потребно е секојдневно да се консумира цинк преку храната. Човечкиот организам содржи 2-3 грама цинк. Препорачаната дневна доза за жените е 8 мг дневно. Кај трудниците тој број се зголемува на 11 мг, а кај доилките на 12 мг. Внесувањето цинк во бременоста позитивно влијае врз здравјето на мозокот на бебето.
Особено внимателни мора да бидат вегетаријанците и оние што не јадат месо – тие треба да земаат дури и повеќе од 50 отсто од препорачаната дневна доза на цинк од храната. Луѓето што се изложени на зголемен ризик од недостиг на цинк се спортистите, алкохоличарите, луѓето со гастроинтестинални болести и оние што долготрајно земаат лекови.
Цинкот во храната помага за да се зајакне имунитетот
Падот на имунитетот е многу честа појава кај луѓето, а може да се случи од повеќе причини. Во тој случај може да се појават чести воспаленија и инфекции кои се повторуваат, хронични инфекции, а закрепнувањето од болести е подолго и отежнато ако имунитетот е слаб.
Врз падот на имунитетот можат да влијаат пушењето, хроничните болести, исцрпеноста и недоволниот сон, физичкиот и психичкиот стрес, неправилната исхрана, недоволното движење… За да го зајакнете имунитетот, можете да почнете да консумирате поголеми количини на цинк преку храната.
Цинкот се содржи во овие намирници:
- производи од месо: телешки црн дроб, јагнешко, говедско, пилешко и мисиркино, свинско
- риби: остриги, ракови, туна, школки
- интегрални житарки и пченични никулци
- јајца
- соја
- пивски квасец
- млечни производи: сирење, млеко и јогурт
- семки – сушени семки од лубеница, семки од тиква, сончоглед, чиа-семе
- јаткасти плодови: кикирики, бадеми, ореви
- зеленчук: краставици, зелена салата, маслинки, кромид, грашок, спанаќ, сладок компир, домати
- овошје: авокадо, банани, киви, јагоди, праски
- какао
Ова се намирници што без проблем можете да ги вклучите во секојдневното мени и да ги комбинирате во разни јадења.
Коментарите се заклучени.