3 минерали… за појак имунитет, поголема енергија и за подобар сон

Елементите во траги – минералите – кои ги внесуваме преку храната играат клучна улога во правилната функција на нашиот организам. Тие влијаат врз работата на сите системи во нашето тело, а дури и најмал нивни недостиг може да доведе до нарушување на општата здравствена состојба. Што вели науката за тоа кои минерали ни се потребни и во колкаво количество?

МАГНЕЗИУМ

Поради добропознатата општа тензија последниве месеци, овој минерал ни е уште попотребен. Имено, кога сме под стрес, организмот излачува магнезиум преку телесните течности, па треба да се надомести. Неговото доволно внесување може да го намали чувството на анксиозност, покажуваат истражувањата.

Магнезиумот е минимално одржлив извор, кажано со речникот на економијата. Тој игра значајна функција во одржувањето на коските, функцијата на мускулите и продукцијата на енергија, а голем број студии укажуваат на тоа и дека го подобрува сонот. Меѓутоа, истражувањата покажуваат дека повеќето од нас не го внесуваат потребното количество магнезиум (за жените тоа е околу 20 мг дневно), а физичката активност може дополнително да ги намали резервите на овој минерал, бидејќи мускулите го користат во текот на вежбањето.

Затоа, потрудете се да јадете доволни количества јаткасти плодови, семки, авокадо, зеленчук и црно чоколадо. Исто така, секогаш постои можност за суплементација: се препорачуваат 300 мг магнезиум-цитрат или магнезиум-глицинат.

ЦИНК

Овој минерал овозможува одржување на функцијата на имунолошкиот систем и, на тој начин, одбрана од разни инфекции, вклучувајќи ја и ковид-19. Судејќи според резултатите на студијата на Универзитетот во Орегон, недостигот од цинк во организмот може негативно да се одрази врз имунитетот на два начина – истовремено предизвикува слабеење на имунолошката реакција во некои клетки, што ја отежнува борбата со инфекцијата и хиперактивноста на другите клетки, што може да предизвика воспалителни процеси и клеточни оштетувања.

Бидејќи основни извори на овој минерал се морските плодови и црвеното месо, вегетаријанците и веганите често не ја обезбедуваат потребната доза од 8 мг дневно. Потребно е да се знае дека мешунките, јаткастите плодови, интегралните житарки и семките од тиква се добри растителни извори. Но ако често се разболувате, експертите советуваат земање цинк во форма на суплементи во дневна доза од 30 мг, но внимавајте да не ја надминете дозата од 40 мг на ден.

ЖЕЛЕЗО

Овој минерал е неопходен за да можат еритроцитите да го пренесуваат кислородот низ целото тело. Покрај тоа, железото игра важна улога за функцијата на мускулите. Ако не се внесува доволно преку храната – јадејќи месо, морски плодови, јаткасто овошје, мешунки, зелен листен зеленчук – може да предизвика општа слабост, нарушена концентрација и покачен ризик од анемија. Жените што се во добра физичка кондиција, особено спортистките, се склони на дефицит од железо, бидејќи го губат и преку менструацијата и преку потењето.

Суплементацијата со овој минерал го подобрува спортскиот перформанс кај спортистките во репродуктивниот период. Но консумирањето прекумерни количества железо може да предизвика гастроинтестинални проблеми и клеточни оштетувања. Затоа е неопходно, пред суплементацијата, да се провери нивото на железото во крвта со едноставна лабораториска анализа.

Текст: Б. Стојменовиќ

Фото: Pexels