Реквизит на месецот: Како да ја користите еластичната лента?

Нека не ве лаже едноставниот изглед на овој реквизит. Еластичната лента може да го направи тренингот мошне поинтензивен.

ЗА ШТО Е НАМЕНЕТА? Отпорот што го чувствуваме за време на вежбите со еластична лента дејствува на нашето тело слично како кога користиме тегови – градиме мускули и согоруваме маснотии, но без опасност да претераме, што може да ни се случи кога вежбаме со тегови.

Вежбите со лента се идеални за оние што закрепнуваат од повреди, бидејќи притисокот врз зглобовите е помал отколку кога вежбаме со тегови.

КОЈА ДА ЈА ИЗБЕРАМ? Колку е лентата поцврста, толку има поинтензивно дејство врз мускулите. Едноставните тркалезни ленти обично доаѓаат со ознаките light, medium, heavy или extra heavy, во зависност од растегливоста. Може да бидат подолги или пократки.

Подолгите се попрактични, бидејќи може да се прицврстат за парче мебел и да послужат за многу поразновидни вежби за различни делови на телото. Оние пократките се одлични за странично одење, кое ги зајакнува глутеусите.

Постојат и ленти со рачка на секој крај, кои овозможуваат правење на движењата како кога се дигаат тегови, а тука се и оние во форма на осумка, исто така со рачки, наменети за вежби за горниот дел на телото.

Испробајте странично одење со еластична лента, кое ќе ги обликува мускулите на задната ложа.

1 За оваа вежба потребна ви е мини-лента. Спуштете ја лентата на подот и зачекорете во неа. Подигнете ја така што ќе ги опфати двата глужда. Исправете се и исправете го грбот, а нозете нека ви бидат во ширината на колковите.

2 Клекнете со исправен грб. Поставете ги рацете пред градите, свиткани во лактите и со испреплетени прсти (како кога се молите), или испружете ги како на фотографијата. Зачекорете со десната нога надесно (странично) колку што можете, па левата нога доближете ја до десната. Повторете ја вежбата четирипати.

3 Истото тоа повторете го на другата страна (зачекорете со левата нога, па доближете ја десната). Секој сет направете го трипати.

Напомени:

+ Доколку ви е претешко да вежбате со лентата, наместете ја околу глуждовите, подигнете ја над колената.

+ Ако се наоѓате во мал простор во кој нема место ни за четири чекори во една, па за четири чекори во друга страна, правете ги исчекорите наизменично со левата, па со десната нога.

5 ВЕЖБИ ШТО ВРЕДИ ДА ГИ ПРОБАТЕ

1 ЗА ДОБРО УТРО

Стапнете на средината на еластичната лента – стапалата треба да ви бидат во ширината на колковите – па во секоја рака земете по еден крај од лентата. Спуштете се во полуклекнување, па подигајте се со испружени раце. Грбот треба да ви биде прав, а рацете малку свиткани во лактите.

2 СКЛЕК

Раширете ја лентата преку рамениците, а нејзините краеви притиснете ги со дланките. Склековите правете ги на вообичаениот начин. Оваа вежба не е за вас доколку не сте вешти во изведувањето склекови.

3 ПОДИГАЊЕ КОЛКОВИ

Легнете на грб покрај клупа. Наместете ја лентата преку двата бута. Потпрете се на клупата со петиците така што колениците ќе ви бидат под агол од 90 степени. Подигајте ги колковите истовремено обидувајќи се да ги раширите колената – со тоа истовремено ги вежбате  глутеусите и бутовите.

4 ВЕЛОСИПЕД

Легнете во положба за стомачни, а мини-лентата обвиткајте ја околу прстите на стапалата. Свиткајте ги рацете во лактите, а дланките треба да се зад главата. Подигајте го горниот дел од телото, ротирајќи се така што десниот лакт ќе го допре левото колено, додека десната нога останува на подлогата.

Лентата ќе создаде дополнителен отпор, кој максимално ќе ги ангажира стомачните мускули.

5 БОКСЕР

Прицврстете ја средината на лентата за мебелот во висина на градите. Фатете ги со рацете левиот и десниот крај на лентата. Развлечете ја лентата оддалечувајќи се колку што е можно од местото на кое сте ја прицврстиле. Зачекорете со десната нога напред и замавнете со левата рака, имитирајќи удар во боксот. Повторете го движењето со левата нога и десната рака.

Текст: Наташа Човиновска