Сакате да го намалите стресот со помош на храната?

Во денешно време, кога животот се одвива со молскавична брзина, стресот, анксиозноста и депресијата стануваат сѐ поприсутни.

Додека различни фактори придонесуваат за проблеми со менталното здравје, не смееме да го потцениме влијанието на секојдневните навики во исхраната врз сопствената емоционална благосостојба.

Храната што ја консумираме не само што влијае врз физичкото здравје туку значително влијае и врз нашето расположение и менталната состојба. Најновите истражувања сугерираат дека усвојувањето урамнотежена и хранлива диета може да биде суштински чекор во борбата против стресот, анксиозноста и депресијата.

Мојот пристап е интегративен и персонализиран пристап кон менталното здравје и благосостојба, што значи дека целокупниот психолошки третман за моите клиенти го креирам, меѓу другото, и врз основа на животниот стил, типот на личност, квалитетот на социјалните и интимни врски, професионалниот живот и, секако, врз начинот на исхрана.

Хранливите материи, како што се витамините, минералите, антиоксидансите и аминокиселините, се од витално значење за правилното функционирање на мозокот и нервниот систем. Еве неколку клучни хранливи материи и нивната улога во поддршката на менталното здравје:

Омега-3 масни киселини: овие здрави масти се клучни за функцијата на мозокот и поврзани се со намалување на симптомите на депресија и анксиозност. Изворите на омега-3 масни киселини вклучуваат мрсна риба (лосос, скуша и сардина), семе од чиа, ленено семе и ореви.

Витамини Б: витамините Б, особено Б6, Б9 (фолати) и Б12, играат значајна улога во синтезата и регулацијата на невротрансмитерите. Соодветното ниво на овие витамини е поврзано со намален ризик од нарушувања на расположението. Храната богата со витамини Б вклучува листен зеленчук, мешунки, цели зрна и посно месо.

Антиоксиданси: храната богата со антиоксиданси помага во борбата против оксидативниот стрес во мозокот, кој може да придонесе за анксиозност и депресија. Разнобојните овошја и зеленчуци, како што се бобинки, спанаќ и слатки компири, се одлични извори на антиоксиданси.

Триптофан: станува збор за аминокиселина што служи како претходник на серотонинот, невротрансмитер, кој промовира чувство на среќа и благосостојба. Храната богата со триптофан вклучува мисиркино и пилешко месо, млечни производи и јаткасти плодови.

Сакате да го намалите стресот со помош на храната?

Проверете дали на вашето мени се застапени:

Сложени јаглехидрати: интегралните зрна, како што се кафен ориз, киноа и овес, имаат стабилизирачки ефект врз нивото на шеќер во крвта. Тие предизвикуваат ослободување на серотонин, кој може да промовира чувство на смиреност и релаксација.

Зеленчук: темнозелените зеленчуци, во кои спаѓаат спанаќот, брокулата и кељот, се богати со магнезиум, кој игра улога во регулирањето на стресот и анксиозноста.

Ферментирана храна: намирниците како јогурт, кефир и кимчи содржи пробиотици што придонесуваат за здрави црева. Балансираната и здрава цревна флора или т.н. микробиом влијае позитивно на менталното здравје. Но, доколку цревниот микробиом е нарушен, чувството на анксиозност и депресија може да се интензивира.

Јаткасти плодови и семки: бадемите, семките од тиква и семките од сончоглед се одлични извори на витамин Е, кој е поврзан со намален ризик од депресија.

Бобинки: не само што се богати со антиоксиданси, туку содржат и витамин Ц, кој има клучна улога во формирањето на колаген, кој ја одржува кожата еластична и младешка. Но тоа не е сѐ: витаминот Ц помага да се намалат физичките и психолошките ефекти на стресот.

Која храна треба да ја редуцирате за подобро ментално здравје?

За подобро психофизичко здравје не е важно само да внесете здрава храна во секојдневното мени – еднакво клучно е да внимавате на храната што може негативно да влијае врз вашето ментално здравје. Затоа потрудете се да создадете диетална навика во која следниве категории на храна и пијалаци ќе ги отфрлите или во најмала рака ретко ќе ги консумирате:

Шеќер и рафинирани јаглехидрати: храната богата со шеќер и рафинирани јаглехидрати може да предизвика флуктуации на нивото на шеќерот во крвта, што доведува до промени во расположението и зголемено чувство на анксиозност.

Кофеин: додека умереното консумирање кофеин може да има одредени придобивки, како што се подобра концентрација и зголемена енергија, секако, кај поосетливите од нас прекумерното внесување може да го влоши чувството на нервоза и анксиозност.

Алкохол: тој е стимуланс, но и депресив, кој ја менува деликатната рамнотежа на хемикалиите во вашиот мозок. Обилното и редовното пиење алкохол е поврзано со депресија.

Преработена и брза храна: оваа храна често е богата со нездрави масти, вештачки адитиви и конзерванси, што може да придонесе за хронични воспалителни процеси и негативно да влијае на расположението. 

Изберете холистички пристап на комбинирање храна со други стратегии

Антидепресивните лекови секогаш не мора да се првиот избор во психолошкиот третман. И храната дејствува како природен антидепресив ако правилно ја изберете. Затоа преземете активна улога во борбата против стресот, анксиозноста и депресијата со тоа што ќе го негувате умот со исхрана богата со хранливи материи, кои ги поддржуваат функцијата на мозокот и емоционалната благосостојба. Запомнете, секој залак што го земате е можност да го нахраните вашиот ум и да направите чекор поблиску до подобро здравје.

Иако здравите диетални навики позитивно влијаат врз менталното здравје, неопходно е да напоменам дека тоа не е самостојно решение. Комбинирањето здрава исхрана и редовно вежбање, доволно сон, техники за намалување на стресот (како што се јога и медитација, на пример) и професионална поддршка од психолог кога е потребно, претставуваат сеопфатен пристап за промовирање позитивна ментална благосостојба.

Советува психолог м-р Жана Базби, која можете да ја контактирате испраќајќи мејл на contact@zanabusby.com