Сте слушнале за синдром Х? Се работи за своевидна одмазда за нашата урбанизација

На овој проблем прво, во 1988 година, обрна внимание професорот Ривен од универзитетот „Стенфорд“, кој предложи да се вика синдром X. Овој научник спроведе истражување и докажа дека дебелината, хипертензијата, високиот холестерол и шеќерот во крвта се најкраткиот пат до инфаркт и мозочен удар.

Синдром Х или метаболички синдром е еден вид одмазда за нашата урбанизација: лоши навики, неправилна исхрана, живот што вклучува малку движење. И сето тоа понатаму може да предизвика сериозни здравствени проблеми.

Не помалку од три симптоми

За метаболички синдром може да се зборува доколку некое лице има најмалку три од следниве симптоми:

* прекумерна тежина;

* висок крвен притисок;

* дислипидемија (промена на односот на липидите во крвта);

* гихт;

* покачени нивоа на машки полови хормони кај жените.

За среќа, болеста може да се лекува, но процесот е долготраен и постепен и треба да се подготвите на тоа.

Активирајте го метаболизмот

Најважно е да поведете сметка за исхраната. Преминете на растителна храна: таа е обилна, брзо го полни желудникот, дава чувство на ситост долго време, а во притоа е нискокалорична.

За да се ослободите од вишокот килограми, од режим на таложење вишок маснотии префрлете го организмот во режим на губење. Едноставно кажано, регулирајте го нарушениот метаболизам. Јадете почесто а помалку. Многумина, напротив, се трудат да јадат помалку за да ја намалат енергетската вредност на исхраната, но ефектот е поинаков!

Од кашите, најдобро е да се избере каша од хелда. Навечер е корисно да се испие чаша кефир, со додавање едно лажиче мелено ленено семе – содржи полинезаситени масни киселини, витамини растворливи во масти, влакна и фитоестрогени (ентеролактони) многу корисни за регулирање на метаболизмот.

Билни мешавини што ги топат мастите

Фитотерапијата помага да се намали ризикот од метаболички синдром. Лековитите растенија имаат повеќекратно дејство: го активираат метаболизмот, го намалуваат апетитот, го топат поткожното масно ткиво, имаат диуретично и лаксативно дејство и ги исфрлаат вишокот холестерол и токсини.

Може да се користи следната мешавина: четири лажичиња плодови од шипка (има диуретичко и холеретичко дејство), по две лажичиња жалфија и пченкарна свила (го намалуваат апетитот, ги подобруваат метаболичките процеси, имаат мало диуретичко и холеретичко дејство), по едно лажиче цветови од камилица и нане (имаат мало холеретичко дејство) и кора од крушина (има мало лаксативно дејство). Сите билки треба да бидат суви и исечкани.

Една лажица од мешавината прелејте со шолја врела вода, оставете да отстои еден час, па процедете. Пијте по една чаша наутро и навечер. Третманот трае максимум седум дена, потоа треба да се направи десетдневна пауза и да се повтори лекувањето.

Ефикасен е и следниот рецепт: помешајте еднакви делови цветови од камилица, плодови од шипка, цвет од липа и лист од нане. Една лажица од мешавината прелејте со шолја врела вода, оставете да отстои 45 минути, па процедете. Земајте по половина чаша два-три пати на ден.

Растенијата што содржат горчливи материи се одличен помошник во борбата против несаканите килограми, бидејќи ги активираат метаболичките процеси и работата на дигестивниот систем. Трипати на ден пред јадење можете да земете на врв од нож мелена жолта линцура и да ја прелеете со вода. Третманот трае од седум до десет дена, а по еднонеделна пауза треба да се повтори.

! Во случај на какво било хронично заболување, консултирајте се со фитотерапевт!

Уште вредни совети

* Лукот и кромидот, сите видови пиперки, куркумата, циметот, ориганото, мајоранот и другите зачини ги подобруваат разградувањето и варењето на храната, служат како катализатори во процесот на варење. Циметот и каранфилчето го забрзуваат метаболизмот, а ѓумбирот го стимулира организмот побрзо да троши енергија. Затоа почесто додавајте ги во вашите оброци.

* За да се ослободите од вишокот маснотии, важно е не само да се храните правилно туку и да спортувате. По вечерата, половина час правете вежби или некои домашни работи. Тоа ќе ви помогне да ги согорите внесените калории.

* Квалитетниот ноќен сон исто така ги топи килограмите. Во тоа време се активира лачењето на лептинот – хормон што учествува во регулирањето на енергетскиот метаболизам и телесната тежина. Тој го намалува апетитот и ја зголемува загубата на енергија, а го менува и метаболизмот на мастите.

* Не заборавајте на водата – таа е идеално средство за спречување на желбата за храна. На желудникот сеедно му е што „ставате“ во него, за него е важен волуменот. Затоа можете да го измамите да не јадете, туку едноставно да испиете вода. Не само што ќе се ослободите од вишокот килограми туку ќе се ослободите и од запек. Водата исто така спречува и рак на мочниот меур.

Заклучокот е едноставен: сѐ во нашиот организам зависи од метаболизмот – и надворешниот изглед и тоа како се чувствуваме. Доколку е метаболизмот нарушен, за почеток е потребно да се врати во правилниот ритам. Во тоа е поентата!

Текст: Наташа Човиновска