Дали брзото слабеење може негативно да влијае на вашиот организам?

Нормално е да сакате да изгубите тежина што е можно побрзо. Но, веројатно ви било кажано дека е подобро да слабеете со бавно, стабилно темпо. Ова е затоа што повеќето студии покажуваат дека луѓето кои слабеат полека имаат поголема веројатност да ја задржат тежината на долг рок.

Кои се штетните ефекти од брзото слабеење?

Иако брзото губење на тежината е примамливо, тоа обично не се препорачува. Диетите кои промовираат брзо губење на тежината често се многу ниски во калории и хранливи материи. Ова може да ве изложи на ризик за многу здравствени проблеми, особено ако следите диета за брзо слабеење подолг временски период. Еве неколку ризици од пребрзо губење на тежината:

Може да изгубите мускули

Губењето килограми не е секогаш исто како и губењето маснотии. Иако многу нискокалорична диета може да ви помогне брзо да изгубите тежина, голем дел од тежината што ја губите може да потекнува од мускулите и водата. Значи, ако брзо ослабете, ризикувате да изгубите мускулна маса.

Брзото губење на тежината може да го забави метаболизмот

Пребрзото слабеење може да го забави вашиот метаболизам, кој одредува колку калории согорувате секој ден. Побавен метаболизам значи дека согорувате помалку калории дневно. Неколку студии покажаа дека брзото слабеење со внесување на помалку калории може да предизвика согорување до 23% помалку калории дневно.

Две причини за опаѓање на метаболизмот при многу нискокалорична диета се губење на мускулите и пад на хормоните кои го регулираат метаболизмот, како што е тироиден хормон. За жал, овој пад на метаболизмот може да трае долго откако ќе завршите со диетата.

Може да предизвика нутритивни недостатоци

Ако не консумирате доволно калории на редовна основа, може да бидете изложени на ризик од недостаток на хранливи материи. Тоа е затоа што е тешко да се внесуваат доволно важни хранливи материи како што се железо, фолна киселина и витамин Б12 со нискокалорична диета. Ова се само некои од последиците од недостаток на хранливи материи:

Губење на косата: Кога јадете малку калории, вашето тело може да не добие доволно хранливи материи за да го поддржи растот на косата, што може да предизвика нејзино опаѓање.
Замор: Сосема е можно да не внесувате доволно железо, витамин Б12 и фолна киселина ако сте на диета за брзо слабеење. Како резултат на тоа, се појавува слаб апетит и хроничен замор.
Ослабен имунитет: Недоволното внесување на хранливи материи може да го ослаби имунолошкиот систем и да го зголеми ризикот од инфекции и болести.
Слаби и кршливи коски: Може да бидат предизвикани од недостаток на витамин Д, калциум и фосфор во исхраната. За среќа, можете да избегнете нутритивни недостатоци ако јадете диета богата со целосна, непреработена храна. Овие намирници содржат помалку калории по грам и исто така се доста заситувачки, што може да ви помогне да изгубите тежина.

Може да предизвика камења во жолчката

Жолчните камења се стврднати парчиња материјал што се формираат во внатрешноста на жолчното кесе. Тие можат да бидат болен несакан ефект од пребрзото слабеење. Жолчното кесе ослободува дигестивни сокови кои овозможуваат варење на масна храна. Ако не јадете многу храна, тогаш жолчното кесе нема да мора да ослободува дигестивни сокови. Камењата во жолчката може да се заглават во отворот на жолчното кесе и да предизвикаат силна болка.