Дознајте како се користи валјакот од пена и кои се придобивките од него за вашето тело

Покрај примената во пилатес-програмите за вежбање, целта на овој ролер е да ја зголеми еластичноста на меките ткива и да ја намали напнатоста, која е последица од изведувањето на некоја активност или на повреда.

Општото упатство на стручните лица гласи: поставете го делот на телото што сакате да го масирате на ролерот, опуштете се, дишете и полека ролајте/тркалајте се преку валјакот со целата должина на мускулот што го масирате.

Мускулите природно ќе се стегнат, особено кога ќе ја погодите болната точка. Внимателно поминете преку тоа место и дозволете му на мускулот да се релаксира. Ако се задржите триесетина секунди на болната точка, ќе забележите дека болката значително ќе се намали во однос на почетокот.

БУТОВИ – ПРЕДНА ЛОЖA

Потпрете се на делот на бутовите што сакате да го измасирате.

Потпирајте се на подлактиците.

Нежно тркалајте ја ногата врз валјакот по целата должина на натколеницата, од врвот на коленото до колкот.

Стегнете го стомакот и држете го грбот во неутрална положба.

АНТИЦЕЛУЛИТНА МАСАЖА

Свртете се настрана и поставете го валјакот на надворешната страна од бутот.

Ова е одлична масажа за упорниот целулит, кој кај повеќето жени се насобира токму во овие делови.

Свиткајте ја горната нога во коленото и префрлете ја пред ногата што ја масирате, заради поголема стабилност.

Нежно тркалајте ја ногата врз валјакот, задржувајќи ја во позициите што се малку непријатни.

БУТОВИ – ЗАДНА ЛОЖА

Седнете на валјакот така што ќе се потпирате на мускулите на задната страна на натколеницата.

Потпрете се на дланките, кои се зад вас.

Ногата што ќе ја масирате останува на валјакот, а другата би требало цело време да ја држите подигната.

Поминувајте со лесни и контролирани движења со целата должина на задната страна на бутот.

ПОТКОЛЕНИЦИ

Масажата на потколениците е особено пожелна по напорен кардиотренинг, како трчање или брзо одење.

Ставете ја потколеницата на валјакот и движете ја врз валјакот со силата на горниот дел на телото, така што задникот цело време да ви е подигнат од земја.

 

ГРБ

Масажа на грбот е препорачлива за сите што водат седентарен начин на живот, од кој најмногу страда долниот дел на грбот.

Наместете се во поза во која ви е пријатно и внимателно тркалајте го грбот врз валјакот.

Можете да ги поставите рацете на земја заради поголема стабилност, а можете и да ги држите на градите.

Текст и фото: „Убавина и здравје“