Инфлуенсерите го вртат светот: Запознајте ги нашите инстаграм-ѕвезди!

ГРИЖАТА ЗА СЕБЕ ПРЕД СЀ

ДАНИЕЛ ТРБОГАЗОВ,

Rising Star @mojtrener.mk

КОЈ Е ДАНИЕЛ? „Работам како тренер по пливање и фитнес и тоа што го гледате на Инстаграм е мојот вистински начин на живот: вежбање, здрава исхрана и грижа за себе.“

ИНСТАГРАМ-ПРОФИЛ ПОСВЕТЕН НА… „Мојот инстаграм-профил е база на фитнес-податоци, каде што се промовираат здрав начин на живот, здрава исхрана и правилно вежбање. Преку него сакам да ги мотивирам моите следбеници да се грижат за себе, па, така, може да се најдат и многу мотивациски пораки, демонстрации на вежби и некои мои досегашни достигнувања, кои би требало да послужат како инспирација. Сакам да им покажам на другите како правилно треба да вежбаат и да се хранат.“

ВО СЛОБОДНО ВРЕМЕ САКАМ ДА… „Нема слободно време. Напорно работам, вежбам и сè во мојот живот се врти околу тој животен стил и грижата за себе.“

МОЕТО ЖИВОТНО МОТО… „Кога ќе го отворите мојот инстаграм-профил, ќе прочитате ‘нема трикови, само напорна работа’. Дефинитивно можам да кажам дека напорната работа ме има донесено таму каде што сум денес. Никогаш не се откажувам. Некогаш кога некој ќе види дека си посилен и подоминантен од другите, те доживува како суперхерој. Јас секогаш велам дека и ние суперхеројите крвавиме, ама многу побрзо закрепнуваме. И ние имаме лоши денови кога не сме мотивирани, ама се трудиме да најдеме мотивација, да ги поместиме сопствените граници и понатаму да продолжиме да се грижиме за себе.“

ПАЛЕТА НА ИНТЕРЕСИ

ЕЛЕНА ГОРГИЕВСКА,

Lifestyle Influencer by Miniso @elena_gorgievska_fitlife

КОЈА Е ЕЛЕНА? „Доаѓам од Русија, мајка ми е Русинка, а татко ми Македонец. Таму живеев 17 години, па дојдов тука за да студирам и сега сум студентка на Стоматолошкиот факултет. Покрај тоа, држам часови во фитнес-студиото ‘Фитлајф’ како инструкторка по пилатес, аеробик и јогалатес. Заедно со сопругот го водиме кафулето ‘Урбанлајф’, каде што работам како шанкерка.“

ИНСТАГРАМ-ПРОФИЛ ПОСВЕТЕН НА… „На мојот профил секогаш може да се најдат разни совети за вежбање, без разлика дали сакате да ослабите, да ја зголемите мускулната маса или да се истегнете, за што многу е добро да се вежба јогалатес, особено за луѓе што имаат проблеми со ‘рбетниот столб и вратот. Покрај тоа, постојано објавувам здрави рецепти и испробани диети што навистина имаат ефект. Редовно истражувам на таа тема, па можам да споделам корисни совети.“

КОГА НЕ СУМ НА ИНСТАГРАМ… „Ме интересираат работи поврзани со убавина и шминка, а многу сакам да цртам. Обожавам рачно изработена облека, па неретко се случува да ги украсам модните парчиња што ги поседувам со мои цртежи. Оваа пасија ја имам наследено од мајка ми, која е модна креаторка и отсекогаш ми давала совети за облекување, ми кажувала кои парчиња одат заедно, а кои можеме да ги направиме сами. Голем љубител сум на животните. Не би можела да живеам без моите три мачки и два папагала, а се надевам дека наскоро ќе чувам и куче.“

МОЈАТА ИНСПИРАЦИЈА… „Вежбањето дефинитивно е мојот најголем двигател. Тоа ме мотивира да не седам дома цело време и да бидам опкружена со луѓе. Во фитнес-клубот каде што вежбам има луѓе на различни возрасти, па имам можност да споделувам искуства со многу различни личности, да се дружам со нив, да посетувам различни места, дискотеки, театри, музеи. Сето тоа е многу инспиративно за мене. Креативноста исто така има голема улога во мојот живот и во сè што правам, без разлика дали се работи за шминкање, облекување или вежбање. Се обидувам ниту еден мој час да не биде ист како претходниот, туку да бидат различни, посебни и интересни за моите вежбачи.“

БИДЕТЕ РАЗЛИЧНИ

НИНОСЛАВ АНТОВСКИ,

Rising Star @iamninoslav

КОЈ Е НИНОСЛАВ? „Дваесет и двегодишен вљубеник во фотографијата, кој живее во Тетово. Ме интересира сè што е поврзано со фотографирањето и обработката на фотографии. Моите креативни дела може да се најдат на мојот инстаграм-профил, но и на мојот блог iamninoslav.blogpost.com. Понатаму дефинитивно се гледам како фотограф.“

ИНСТАГРАМ-ПРОФИЛ ПОСВЕТЕН НА… „Погодувате, нели? Секако дека мојот инстаграм-профил е посветен на фотографијата. Портрети, архитектура, храна, обични секојдневни работи, како што се пиењето кафе и читањето добра книга – може да се најде од сè по нешто, дел од сето она што го исполнува нашето секојдневје.“

КОГА НЕ СУМ НА ИНСТАГРАМ… „Кога не фотографирам и објавувам фотографии, обожавам да читам книги. Трчањето и спортувањето исто така се неизоставен дел од мојот животен стил. Тоа се работите со кои го исполнувам слободното време и кои ме прават посреќен.“

МОЈАТА ИНСПИРАЦИЈА… „Ме инспирира сето тоа што ме опкружува. Сè што можам да видам, ми дава идеја за нова фотографија. Уникатноста е мојот заштитен знак, па затоа мотото по кое се водам гласи ‘биди различен, биди тоа што си’.

НАЈДЕТЕ ЈА ИНСПИРАЦИЈАТА ВО СЕБЕСИ

СТОЈАН СИМЈАНОСКИ

Lifestyle Influencer by KFC @simjanoski.s

КОЈ Е СТОЈАН? „Последнава година работам во ’Бекстејџ’ и целиот ангажман околу емисијата не ми дозволува да правам многу други работи. Но затоа, пак, си ја сакам работата, бидејќи истовремено ми овозможува да работам, да излегувам и да уживам.“

ИНСТАГРАМ-ПРОФИЛ ПОСВЕТЕН НА… „Инстаграмот го користам за себеси. На мојот профил може да се најдат производи од брендовите со кои соработувам неколку години, па затоа тој ќе им биде интересен на сите што обожаваат очила за сонце и други модни парчиња. Внимавам секогаш да бидам добро облечен и мислам дека со тоа им давам на моите следбеници пример како треба да изгледа еден современ маж, во согласност со можностите што ги нуди нашето општество. Исто така, на моите фотографии секогаш може да се види различна фризура. Сметам дека мојот профил може да послужи како добра инспирација кога некој не знае што да облече или како да ја стилизира косата.“

ВО СЛОБОДНО ВРЕМЕ САКАМ ДА… „Немам многу слободно време, но тоа малку што го имам, гледам да го поминам со пријателите и со блиските. Мојата најголема пасија е новинарството, но и сè што е поврзано со уметност: глума, слики (не мислам на сликање, туку на тоа да стојам пред објектив додека ме сликаат) и пеење. Знам да запеам кога ќе излезам и кога ќе ме понесе атмосферата.

МОЈАТА ИНСПИРАЦИЈА… „Отсекогаш сум сакал да се занимавам со јавна професија. Мотивација добивам од различни нешта. Немам една константна мотивација, но веројатно тоа што уште од мал сакам да се занимавам со јавна професија, ми послужило како главен поттик. Инспирација црпам од самиот себеси. Кога ќе видам дека нешто сум сработел одлично, следниот пат гледам да бидам уште подобар. Успехот е мојата најголема инспирација.“

ИНСПИРАЦИЈАТА Е НАСЕКАДЕ ОКОЛУ НАС

ВАЛЕРИЈА ПРЕСПАНОСКА,

Rising Star @valerijaprespanoska

КОЈА Е ВАЛЕРИЈА? „Моментално се занимавам со блогерство и работам на хонорарни ангажмани поврзани со социјалните мрежи. Многу сум среќна што инфлуенсерството полека почнува да се сфаќа сериозно и кај нас и брендовите сè повеќе нè ангажираат нас, инфлуенсерите, за да ги претставуваме нивните производи, па може да се заработи добро.“

ИНСТАГРАМ-ПРОФИЛ ПОСВЕТЕН НА… „Мода, патувања, шминка, уметност… Сето тоа што го исполнува моето време и ме прави среќна. Сакам да го споделувам моето секојдневје со моите следбеници на Инстаграм.“

КОГА НЕ СУМ НА ИНСТАГРАМ… „Цртањето е уште една моја пасија, за која сè поретко имам време, за жал.“

МОЈАТА  ИНСПИРАЦИЈА… „Мотивација и инспирација наоѓам секојдневно на најразличен начин, без разлика дали станува збор за слика, одредена ситуација или разговор…“

НАСМЕВНИ СЕ ЗА СРЕЌА!

ХРИСТИНА МАНЧЕВА,

Happiness @_manche

КОЈА Е ХРИСТИНА? „Живеам во Охрид, имам 24 години и се занимавам со дизајн, маркетинг и фотографија. Сите овие вештини имам можност да ги споделам со пошироката јавност, благодарение на Инстаграм.“

ИНСТАГРАМ-ПРОФИЛ ПОСВЕТЕН НА… „Многу сакам да си играм со фотошоп и со дизајн, па на мојот профил може да се видат фотографии обработени на интересен и креативен начин. Преку моите објави на Инстаграм се обидувам да ширам позитивна енергија, насмевки и да споделувам оригинални идеи.“

КОГА НЕ СУМ НА ИНСТАГРАМ… „Моја пасија се модата и шминката. Во слободно време пробувам разни модни комбинации, експериментирам и го истражувам мојот стил.“

МОЕТО ЖИВОТНО МОТО… „Немојте да обрнувате внимание на негативните коментари и провокации. Бидете тоа што сте и не споредувајте се со конкуренцијата, бидејќи сите сме различни. Гледајте пред вас и за вас. Поддршката секому му значи, па затоа ширете љубов, а не омраза и презир.“

Подготвила: Марија Лукаревска

ФОТО: Александар Вржалски, приватна архива