САЕМСКА ПРОМОЦИЈА НА НОВАТА КНИГА НА КОСТА ПЕТОВ „ШТО ЌЕ КАЖАТ ДРУГИТЕ“?

На 4 мај, со почеток од 18 часот, на штандот на ТРИ на Саемот на книгата ќе се одржи промоција на новата книга на Коста Петров, насловена „Што ќе кажат другите?“.

Коста Петров е автор чии книги со години редат успеси и доживуваат реизданија, а неговата читателска публика постојано расте. „Што ќе кажат другите?“ е автобиографија поинаква од неговите претходни книги, огледало на една досега неприкажана страна на Петров.

На овогодишниот Саем на книгата во Арената А1 на салата „Борис Трајковски“, оваа книга ќе биде меѓу новитетите на штандот на ТРИ. На нејзината промоција авторот Петров ќе зборува за своите животни и книжевни искуства и ќе потпишува примероци. Пред да дојде во допир со свежопечатените примероци што ќе пристигнат ексклузивно на Саемот, секој читател ќе има можност да чуе барем дел од одговорите на животните прашања што ги дава ова четиво. Најголемите животни совети произлегуваат од личните искуства на луѓето што виделе и доживеале многу, а советите од Коста Петров несомнено го докажуваат тоа.

Домашната книжевна сцена меѓу страниците испишани од македонски автори добива уште едно дело вредно за п(р)очит, дело кое го збогатува Саемот на книгата. Да учиме од поуките на македонските писатели, да живееме саеми на кои ќе се слави зборот и на кои со радост ќе се потсетуваме!