Мал филмски лексикон на Лидија Мојсовска: Погледнете филмови по препорака на нашата режисерка

Барате филмски препораки што ќе ви го разубават слободното време? Вашата потрага може да заврши… барем додека ги изгледате остварувањата што ги препорачува режисерката Лидија Мојсовска.

Кој филм го сметаш за култен?

Дефинитивно Декалогот на полскиот режисер Кристоф Кишловски. Тоа е мајсторски сработен циклус од десет среднометражни филмови, кој првично бил наменет за полската национална телевизија. Реалистичен, болен, меланхоличен, суптилен и брутално искрен приказ на Полска во доцните 1980-ти и последните крици на советското владеење.

Со кои актери/актерки би сакала да работиш?

Уживам да ги погледнам сите можни опции на актери и актерки и отворена сум за сечиј потенцијал. Особено ме привлекуваат непрофесионалните актери, бидејќи внесуваат специфичен документаризам и веризам во целиот процес.

Серија или филм?

Филм. Не сум љубител на серии. Тие ми се како брзи залаци од вкусна храна што морам да ги голтнам без да ги џвакам.

Како ја гледаш иднината на македонскиот филм?

Во последниве неколку години сме сведоци на големи успеси на нашите филмови на реномирани европски и светски фестивали. Иако во суштина фестивалскиот успех не е секогаш показател за квалитетот на филмот, македонскиот филм конечно мрдна од место, покажувајќи голем потенцијал за дефинирање свој автентичен израз.

Топ 5 филмски препораки?

1. „Вкусот на црешите“ на Абас Киаростами – Великанот на иранскиот филм. Ако треба да издвојам репер за добро напишано сценарио, тогаш го издвојувам овој филм.

2. „За Ели“ на Ашгар Фархади – Иако сум љубител речиси на сите негови филмови, овој го издвојувам поради неговата комплексност во приказната, но едноставност во реализацијата.

3. „Смртта на господинот Лазареску“ на Кристи Пуиу – Апсурдна црна комедија, која истовремено буди екстремно контрастни емоции.

4. „Умберто Д“ на Виторио де Сика – Го препорачувам поради веризмот и искреноста што ги носи главниот лик. Просто нема шанси да не навиваш за него.

5. „За телото и душата“ на Илдико Ениеди – Бизарна, урбана и истовремено брутална приказна за двајца љубовници, каде што сонот како елемент го зазема главното место.

Разговарала: Марија Лукаревска

ФОТО: ПРИВАТНА АРХИВА

Чек-листа на Лавинија Софрониевска: Што да слушате, гледате, читате…?