Овој месен ролат е одличен предлог за ручек
Состојки:
- 700 г мешано мелено месо
- 2 јајца
- 120 г интегрална кифла
- 150 мл млеко
- 1 поголем компир
- 50 г рендан пармезан
- 50 г месеста сланина
- 1 помала главица црвен кромид
- 2 чешниња лук
- 1 лажица пипер
- 2 лажици сечкан магдонос
- 150 г тенко сечкана мортадела
- 200 г кашкавал гауда во листови
- бибер
- масло
- сол
За прилогот:
- 500 г компири
Приготвување:
1. Компирот сосе лушпа се вари, а потоа се лупи и се пасира.
2. Интегралната кифла се сечка на коцки, се прелева со млеко, а потоа се цеди и се дроби.
3. Црвениот кромид се чисти и се сечка на коцки, лукот се пасира. Сланината исто така се сечка на коцки.
4. Во сад се мешаат меленото месо, црвениот кромид и лукот, сланината, компирот, пармезанот, издробената кифла, јајцата, пиперот и магдоносот. Се посолува и забиберува по вкус, па добро се меша, да се добие воедначена смеса. Се остава да отстои во фрижидер 30 минути.
5. Се намрсува алуминиумска фолија и на неа се става смесата од месото. Со намрсени дланки се обликува правоаголник, се прекрива со листовите од мортадела и гауда, па со помош на фолијата цврсто се витка во ролат. Ролатот се остава во фолијата, а краевите се свиткуваат.
6. Плехот се обложува со хартија за печење и се попрскува со масло, се става месниот ролат, а околу него се распоредуваат компирите, исчистени и исечкани на покрупни коцки. Се пече во загреана рерна на 200°Ц, околу 35 минути, а потоа се отстранува фолијата и се продолжува со печење додека месото зарумени, а компирот омекне.
Извор: Добра храна