Тешко е да се изгуби некој близок, но мора да се живее…

Пред година и пол почина син ми. По неговата смрт, животот стана невозможен. Имам само 50 години, но постојано ме мачат силни главоболки, депресија, се чувствувам многу лошо, дури и цревата ме болат… Ве молам, предложете ми некој народен лек, ако воопшто постои таков.

Немам доволно пари за апчиња и приватни прегледи, а морам да живеам, сепак зад син ми остана неговото семејство – сопругата и детето. Сакам да им бидам од корист.

Светлана

Одговара професорот Владимир Николаевич Вишњов, лекар и фитотерапевт

Почитувана Светлана, се разбира, твојата тага не може да се олесни со ништо. Загубата на дете за мајката е навистина страшна. Но, ако Бог ви дал можност да живеете, вие треба да живеете и пожелно е тоа да биде без слабост и болест.

Да се ​​биде депресивен, да имате главоболки и нарушувања на спиењето – тоа се нарекува функционално нарушување на централниот нервен систем.

Оваа патолошка состојба треба да се третира со помош на лековити билки.

Наутро се задолжителни билки адаптогени. Во вашиот случај најдобри се капките од елевтерокок, кои се продаваат во аптека во вид на екстракт – по 10–15 капки со третина чаша вода.

Можете да применувате и корен од родиола розеа (лат. Rhodiola rosea; се нарекува и сибирска ружа или златен корен). Од коренот се прави одвар или алкохолни капки.

* Приготвување на одварот: четврт лажиче исечкан корен прелејте со шолја вода. Поклопено варете го на тивок оган 30 минути, па оставете го да отстои еден час. Пијте наутро и прекуден, по половина шолја, независно од оброците.

* Приготвување на капките: 100 г исечкан корен прелејте со еден литар 45-процентен алкохол. Оставете да отстои 20 дена на темно место и на собна температура. Пијте по две до пет капки наутро и прекуден, со третина чаша вода.

Третманот трае два-три, па и повеќе месеци. Овие капки се особено корисни од октомври до март, кога се намалува одбранбената сила, се влошуваат расположението и субјективното чувство, а може да дојде и до депресија.

Неопходно е прекуден, приквечер и особено пред спиење да пиете одвар од лековити билки што имаат смирувачко, спазмолитичко и аналгетско дејство.

Такви се валеријаната (корен), божурот (корен), сината јасеновка (лат. Polemonium caeruleum) (корен), срценицата (стебло), нането (стебло), маточината (стебло), бајкалското капче (лат. Scutellaria baicalensis; се нарекува и кинеско капче) (корен), хмељ (плодови) и др.

На пример, од корен од валеријана може да се направат одвар и алкохолни капки.

* Приготвување на одварот: едно лажиче исечкан корен прелејте со 300 мл вода. Варете го 20 минути на тивок оган, поклопено. Оставете го да отстои 40 минути. Пијте по половина чаша прекуден и навечер, како и една чаша пред спиење.

* Приготвување на капките: 100 г корен прелејте со литар 40-процентен алкохол. Оставете да отстои 20 дена на темно место и на собна температура. Земајте по 20–30 капки два-три пати дневно, претежно во другата половина на денот – навечер и пред спиење, со третина чаша вода.

Во овој случај можам да ви препорачам да соберете и дома да направите смирувачки билен чај од следниот состав: половина дел корен од валеријана, два дела стебло од срценица, третина дел стебло од нане, десеттина дел плодови од хмељ, по еден дел стебло од медуника, иван-чај и исландски лишај.

Една лажица од мешавината прелејте со половина литар вода. Поклопен варете го на тивок оган 15 минути, а потоа оставете го да отстои 30 минути. Пијте по половина чаша прекуден, навечер и пред спиење, независно од оброците.

Третманот трае два-три, па и повеќе месеци. Покрај тоа што има смирувачко дејство, овој чај ја подобрува работата на срцето и крвните садови и ги намалува болките и спазмите во цревата.

Биолошки препарати

Користејќи смирувачки билки, постепено ќе ја вратите нормалната работа на централниот нервен систем и ќе го подобрите спиењето, нападите на главоболка ќе се проретчуваат, а општата состојба исто така ќе биде многу подобра.

За да се подобри работата на цревата, ќе биде корисно да се спроведат два-три третмана за лекување со биолошки препарати – секој по 15 дена (препаратите може да ги набавите во аптека). Тие ќе дејствуваат подобро ако ги користите заедно со лековити растенија.

Така, можете да направите одвар од следниот состав: по една лажица плодови од шипка и цетрарија (исландски лишај) прелејте со литар врела вода.

Пијте две третини од чаша два или три пати на ден, без оглед на оброците.

Третманот трае две-три недели, заедно со биолошките препарати.

Ви посакувам сѐ најдобро!

Текст: „Руски доктор“

Фото: Pixabay, Unsplash