Среде невремето што вчера го погоди Скопје и зад себе остави урнати дрвја, оштетени возила и сцени на вистински хаос, една приказна за човечност и професионалност се издвои и ги освои социјалните мрежи.
Додека силниот ветер кршеше гранки, носеше покриви и парчиња фасади, возач на автобус на линијата 65 одлучи дека безбедноста на патниците е поважна од сè.
„Не нè истовари на немилост – остана со нас додека помине најлошото“
За неговиот потег сведочи објава на граѓанката Далиборка Младеновска, која за кратко време доби голем број реакции и споделувања на Фејсбук.
Според нејзиното сведоштво, автобусот бил кај Бит-пазар кога почнало силното невреме.
Нè зафати страшно невреме. Летаа парчиња од зграда директно кон автобусот, а дрвја паѓаа на сите страни“, напиша таа.
Во такви околности, наместо да ги симне патниците и да ја прекине линијата, возачот останал смирен и донел одлука прво да ги однесе на безбедно место.
Автобусот бил насочен кон гаражата во Автокоманда, каде што патниците останале засолнети додека помине најопасниот дел од невремето.
Потоа продолжил по трасата и ги однел дома
Поврзани објави
Кога временските услови се подобриле, возачот повторно тргнал на пат и ги превезол патниците до нивните дестинации, наместо да ги остави сами да се снаоѓаат во услови на силен ветер и опасност од паѓање дрвја и други предмети.
Не само што нè однесе на сигурно, туку почека да помине најлошото и потоа сите нè однесе безбедно. Не нè остави на милост и немилост на невремето“, стои во објавата.
„Светот има потреба од повеќе вакви луѓе“
На крајот, авторката на објавата му упати јавна благодарност на возачот, нагласувајќи дека токму во тешки моменти најдобро се гледа човечноста.
Огромно браво и длабока почит за овој човек. Светот има потреба од повеќе вакви професионалци и луѓе со големо срце“, напиша таа.
Во морето фотографии од урнати дрвја, искршени семафори и материјална штета што ги преплавија социјалните мрежи по вчерашното невреме, оваа приказна потсети дека и во најтешките моменти има луѓе кои со присебност, одговорност и човечност прават разлика.
Понекогаш, токму ваквите гестови остануваат најсилниот впечаток по една елементарна непогода.
Фото: Facebook