Хаос во Италија поради „сендвич-туристите“: Доаѓаат со храна од дома и ги револтираат сопствениците на бич-баровите

Туристите што летуваат на приватните плажи во италијанскиот регион Апулија носат свои сендвичи, а дел од управителите на плажите ја критикуваат оваа практика, пренесуваат италијанските медиуми.

Претседателот на регионот ги брани туристите, додека угостителите зборуваат за „естетика“, „ред“ и „заштита на угостителската дејност“ што се одвива во рамките на плажите.

За што станува збор?

Прашањето за носење сопствена храна брзо предизвика реакции во јавноста, особено откако во дебатата се вклучи претседателот на регионот Апулија, Антонио Декаро.

Како што пренесува „Foggia Today“, политичарот застана на страната на посетителите на плажите и изјави дека луѓето кои платиле чадор и лежалка треба да имаат право на плажа да го изедат својот сендвич подготвен дома.

Апсолутно не се согласуваме со забраните. Работиме на тоа морето да биде искуство на слобода за жителите на Апулија и за многуте луѓе кои доаѓаат од други места за да го откријат нашиот регион. Морето е општо добро и од тој принцип нема отстапување“, нагласил тој, додавајќи дека цените на чадорите и лежалките веќе се превисоки.

„Дали навистина, во име на наводната грижа за редот и естетиката, можеме да бараме од луѓето кои избираат приватна плажа да јадат исклучиво во барот или ресторанот што му припаѓа на тој објект?“, прашал тој.

„Тоа е како да внесувате пијалак во клуб“

Реакцијата од дел од туристичкиот сектор била веднаш. Некои сопственици и управители на плажи тврдат дека таквиот пристап им нанесува штета на угостителските објекти што работат на плажите.

Дури било направено и споредување дека носењето сопствена храна е слично како влегување во дискотека со пијалак купен претходно во супермаркет.

Сепак, овој аргумент не ги убедил многу коментатори. Како што истакнуваат италијанските медиуми, ноќниот клуб е приватен простор. Од друга страна, приватните плажи функционираат на јавни површини кои им се дадени на претприемачите под закуп.

Тоа значи дека тие вршат деловна дејност на дел од јавниот брег, но не стануваат сопственици на морето или на плажата.

Спорот се проширил и во други региони во Италија. Сардинискиот портал „Sardegna e Liberta“ оценил дека концесиите за управување со плажите треба да служат за олеснување на пристапот до јавните плажи, а не за ограничување на начинот на кој тие се користат.

Авторот на коментарот нагласил дека претприемачите кои нудат лежалки и чадори не стануваат сопственици на морето, а посетителите на плажите не би требало да бидат обврзани храната и пијалаците да ги купуваат исклучиво во објектите што работат во рамките на плажата.

Што мислите вие?

Текст: Убавина и здравје

Фото: Pexels