ЧЕКОР ПО ЧЕКОР: 30-дневна програма за здрава исхрана и за аеробно одење

Направете го првиот чекор на патот кон подобра кондиција, повита става и кон поздрав живот – прочитајте го нашиот водич „чекор по чекор” за диета со одење.

Не, не станува збор само за уште една диета. Оваа програма на вежби и на исхрана, која нуди мошне едноставен а делотворен план, се базира на грчката филозофија „диата”.

ЧЕКОР 1: Запознајте ги своите потреби

На старите Грци им бил познат рецептот за повисок квалитет на животот. Тие го интегрирале во филозофијата на „диата”, која се базирала на комбинација на физички вежби и здрава исхрана. Во основата на „диата” е мотото:

Запознај се себеси. Запознај ги своето тело и својот начин на размислување. Запознај ги своите реални потреби.”

Колку луѓе свесно купуваат хранливи состојки во текот на неделата според некој организиран, научно основан план?

Вистината е дека храната не е наука, туку уметност. Многу е поважно да знаеме која храна треба да ја јадеме, а која да ја избегнуваме, отколку слепо да се придружуваме до некои стриктни прописи. Токму тоа ја сочинува „диатата”: урамнотежен, умерен пристап.

Најкорисна промена што можете да направите во својот живот е да направите свесна ревизија на она што го јадете и го пиете.

Сочинете список намирници што редовно ги консумирате (не е лоша идеја цела недела да водите дневник на исхрана), а потоа споредете го со нашата листа препорачливи намирници.

Тоа ќе ви помогне да ги одредите промените што треба да ги внесете во својата исхрана (да ја намалите употребата на некои намирници, а да го зголемите консумирањето други). Со други зборови, сами да ја испланирате својата лична „диата”.

ЧЕКОР 2: Вашето ново мени

Еве до кои принципи треба да се придржувате за поздрава исхрана, а со тоа и за симнување на вишокот килограми.

Намалете ги мастите: најважна задача е да избегнете консумирање заситени маснотии, кои може да доведат до покачено ниво на холестерол во крвта. Заситените маснотии се наоѓаат во намирници од животинско потекло – црвено месо и млечни производи.

Избегнувајте пржена храна, и кога готвите употребувајте масла со низок процент заситени, а со висок процент незаситени маснотии.

Избегнувајте рафинирани јаглехидрати: некои автори шеќерот го опишуваат како „прочистен, бел, смртоносен”. Тој дава многу енергија (калоричен е), но нема никаква хранлива вредност.

Ако го исфрлите од исхраната, ништо нема да загубите, а ќе стекнете огромна почетна предност во намалување на калориите.

Запомнете, шеќерот во скриена форма се наоѓа во многу конзервирани производи, млечни напивки, кечап…

Помалку протеини!: Човекот внесува двојно повеќе протеини отколку што му е потребно. Пожелно е помалку да јадеме црвено месо, а повеќе риба, исто како и мешунки, кои се богат извор на протеини.

Повеќе влакна!: Влакната ни помагаат да ослабиме, затоа што ни даваат чувство на ситост, а не дебелеат. По својот состав тие се сложени јаглехидрати – се состојат од скроб и влакнести материи. Ги наоѓаме во житарки, овошје и зеленчук, мешунки и во јаткасто овошје.

Одвикнете се од (пре)слано: Во организмот внесуваме десетпати повеќе сол отколку што ни е потребно. Во просек, тоа се две кафени лажици на ден, од кои половина е солта што произведувачите ја додаваат при производство на своите производи.

Вишокот сол во исхраната може да го покачи крвниот притисок. Обидете се постепено да го намалите внесувањето сол, заменувајќи ја со други зачини, како што се разни ароматични билки.

Текстот продолжува на следната страница…