Разликите се големи и влијаат на пливањето, кожата, но и на морскиот свет.
Кога ќе влезете во море, веројатно сте забележале дека во некои мориња полесно се плови, а по капењето кожата останува „солена“. Причината е различната концентрација на сол во водата, односно салинитетот.
Според океанографските податоци, Егејското Море е најсолено од трите најпосетувани мориња на Балканот. Во просек содржи 38 до 39 грама сол на еден литар вода, што е типично за источниот Медитеран, каде испарувањето е големо, а дотокот на слатка вода е мал.
Јадранското Море е веднаш зад него, со просечна соленост од 37 до 38 грама сол на литар вода. Во јужниот дел соленоста е поголема, додека на север е нешто пониска поради влијанието на реките што се влеваат во морето.
Најмалку солено е Црното Море, кое содржи околу 17 до 18 грама сол на литар вода – речиси двојно помалку од Егејското и Јадранското. Причината е што во него се влеваат големи реки како Дунав, Днепар и Дон, кои внесуваат огромни количества слатка вода.
Поврзани објави
Разликата во соленоста влијае и на чувството при пливање. Во посолените мориња телото полесно лебди, додека во Црното Море тоа е нешто потешко. Соленоста има важна улога и за морскиот екосистем, бидејќи од неа зависат многу растителни и животински видови.
Редослед по соленост:
- Егејско Море – 38–39 г/л
- Јадранско Море – 37–38 г/л
- Црно Море – 17–18 г/л
Фото: Pexels/Dimitri Dim