Она што требало да биде вообичаено чистење по заминувањето на гостите, се претворило во непријатно изненадување за сопствениците на една вила во хрватската Новаља. Наместо уреден простор, ги дочекала сцена со расфрлан отпад, оштетен инвентар и столчиња фрлени во базенот.
Видеото што го снимиле веднаш по влегувањето во вилата за кратко време стана вирално на социјалните мрежи и отвори жестока дебата за тоа каде завршува обврската на домаќинот, а каде почнува одговорноста на гостите.
Според сопствениците, група британски туристи престојувала во вилата само пет дена, но зад себе оставила сцени што, како што велат, никогаш досега не ги доживеале.
На снимката се гледаат празни шишиња, остатоци од храна, пластични кеси, картонски кутии, облека, пешкири, тоалетна хартија и друг отпад расфрлани низ речиси целиот објект.
Особено шокантна е состојбата околу базенот. Во водата се гледаат пластични лежалки и столчиња, како и отпад што плови по површината, додека лежалките околу базенот се превртени и расфрлани.
Според тврдењата на сопствениците, дел од предметите биле фрлани и преку оградата на вилата, завршувајќи во соседниот двор.
View this post on Instagram
Интернетот поделен: „Ова е вандализам“ или „Затоа се плаќа чистење“?
Објавеното видео за само неколку часа собра голем број прегледи и коментари, а реакциите на јавноста се целосно спротивставени.
Голем дел од корисниците сметаат дека ваквото однесување е неприфатливо и претставува израз на непочитување кон туѓиот имот.
Неред е едно, а ова е чисто дивеење“, „Без разлика колку сте платиле, мора да покажете основна култура“, се само дел од коментарите.
Но има и такви што сметаат дека сопствениците претерале со реакцијата.
Според нив, гостите платиле значителна сума за престој, а во цената најчесто е вклучен и надоместок за завршно чистење, па затоа очекувале вилата да биде исчистена по нивното заминување.
Сепак, многумина во дискусијата нагласуваат дека постои голема разлика меѓу вообичаен неред по престојот и намерно оставање отпад, фрлање мебел во базен и уништување на просторот.
Видеото продолжува масовно да се споделува на социјалните мрежи, а дебатата не стивнува.
А вие што мислите – дали ваквата состојба е дел од услугата што ја плаќаат туристите или претставува недозволиво непочитување на туѓиот имот?
Видео: Инстаграм
Поврзани објави