Еден од најозборуваните и најконтроверзни моменти во историјата на Мет гала останува инцидентот од 2014 година, кога во центарот на вниманието се најдоа Бијонсе, Џеј Зи и Соланж Ноулс – по драматичниот настан во лифтот што засекогаш ја обележа поп-културата.
Сè се случило ноќта на 5 мај 2014 година, по Мет гала забавата во њујоршкиот хотел The Standard, каде што семејството Ноулс-Картер присуствувало на забавата по престижниот настан. Она што почнало како обична вечер, за миг се претворило во медиумска бомба.
Снимките од надзорните камери, кои подоцна протекоа во јавноста преку порталот TMZ, прикажуваат како Соланж физички се нафрла врз Џеј-Зи во лифтот, додека обезбедувањето се обидува да ја смири ситуацијата. Во исто време, Бијонсе останува настрана, без видлива реакција, што дополнително ги разгоре мистеријата и шпекулациите.
По инцидентот, тројцата го напуштиле хотелот одделно – Бијонсе и Соланж заедно во едно возило, а Џеј-Зи во друго – што веднаш предизвикало лавина од прашања и теории за тоа што навистина се случило зад затворените врати.
Под притисок на јавноста, тие подоцна објавија заедничко соопштение во кое истакнаа дека семејството ја надминало ситуацијата и дека сите инволвирани ја преземаат својата одговорност за „приватна семејна работа која завршила во јавност“.
Во изјавата нагласија и дека нема основа за гласини за алкохол или нерационално однесување, додавајќи дека секое семејство има свои несогласувања, но дека тие остануваат обединети.
И покрај официјалното затворање на случајот, вистинската причина за конфликтот никогаш не беше јавно објаснета. Мистеријата дополнително беше хранета од медиумите и фановите, кои со години се обидуваат да ги „прочитаат“ скриените пораки во нивната музика.
Подоцна, Соланж накратко изјави дека најважно е семејството да е добро и дека стои зад заедничкото соопштение, додека Џеј Зи подоцна истакна дека инцидентот бил единствено недоразбирање во нивниот однос и дека Соланж ја смета за своја сестра.
Иако поминаа години, „лифт-драмата“ останува еден од најпознатите скандали во историјата на Мет гала – момент кога приватниот живот на светските ѕвезди експлодираше пред очите на јавноста и засекогаш влезе во поп-културната легенда.
Видео: Youtube