Откако последната статуетка беше свечено доделена на годинешниот избор Influencer Awards, а победниците ги прегрнаа своите блескави титули, салата на Raguza 360 беше подготвена за вториот дел од магичната вечер – забавата што со право се најавуваше како спектакл.
Над 600 гости, возбудени од гламурот и емотивните моменти на доделувањето, едвај го чекаа стартот на музичната програма.
И навистина, сцената експлодираше со енергија кога добро познатите Brass Brothers го започнаа својот настап. Нивниот препознатлив, динамичен звук ја преполни салата со ритам, а гостите веднаш му се препуштија на танцот.
Со секоја изведена нумера, бендот ја креваше атмосферата сè повисоко, воден од својата неверојатна харизма и искуство да создаваат вистинска еуфорија.
Но вечерта штотуку се загреваше.
Вистинското изненадување на ноќта беше музичкиот двобој што Brass Brothers го приредија со еден од најинтересните македонски состави — „Пауза за ракија“.
Кога на втората бина спроти главната сцена се појавија и тие, гостите разбраа дека ќе следи нешто сосема поинакво, нешто што ретко се гледа дури и на најголемите концерти.
Поврзани објави
Два бенда, две различни енергии — еден незаборавен музички „двобој“.
Парче по парче, ритам по ритам, тие си подаваа музички „предизвици“, наизменично ја освојуваа публиката и уште повеќе ја потпалуваа атмосферата. Од моќни дувачки експлозии, до темпераментни етно-вибрации, музичкиот двобој прерасна во вистински спектакл што ги крена сите на нозе.
Гостите аплаудираа, снимаа, играа, а неколку моменти дури делуваа како сцени од филм — вечер преполна со сјај, маски, емоции и музика што одекнуваше до доцните часови.
И токму така, Influencer Awards 2025, кој и онака блескаше во својот гламур, доби уште една причина да биде запаметен — како ноќ кога ѕвездите беа на сцената, но и во салата, распеани и расплескани во ритамот на двата бенда што приредија шоу за паметење.
ФОТО: НИКОЛА ДАНЕВСКИ