Ленче Карпузовска, менаџерка на Одделот за комуникации во ЕВН.
Во време кога зборовите можат да изградат доверба – но и за миг да ја урнат, да се биде на чело на комуникациите во компанија што претставува дел од енергетскиот столб на државата е повеќе од позиција – тоа е одговорност со тежина.
Ленче Карпузовска е професионалец што се издвојува по доследноста и интегритетот, но и по ретката комбинација на спонтаност и човечност во комуникацијата. Нејзиниот пристап не е само технички – туку длабоко човечки.
Последната потврда за тоа пристигнува преку престижното признание PRO PR Globe People Achievement Awards – награда што го слави влијанието и личниот придонес на врвните имиња во ПР-индустријата. И тоа – без влијание на финансиски фактори, туку исклучиво врз основа на кредибилитет и резултати.
„Не постои тајна формула – постои интегритет“
Што стои зад ваков успех?
Би сакала да кажам дека има формула, но вистината е поедноставна – искрена посветеност, љубов кон работата и храброст да останете свои, дури и кога е најтешко,“ вели Карпузовска.
Таа верува дека кога вложувате со интегритет, резултатите доаѓаат – понекогаш тивко, понекогаш гласно, но секогаш заслужено.
Патот до светска сцена? Како wi-fi сигнал
Професионалниот пат од Македонија до глобално признание, според неа, не е ниту прав, ниту совршен.
Најмногу наликува на wi-fi сигнал – со прекини, нестабилности и моменти кога конекцијата не е најдобра. Но ако сте упорни и автентични – на крај ќе бидете и слушнати и видени.“
Во ерата на ВИ: Најголемиот предизвик е да останеме луѓе
Во време на брз технолошки напредок, таа е јасна – човечкиот фактор останува незаменлив.
Вештачката интелигенција може да анализира и предвидува, но не знае да почувствува. Емпатијата и интуицијата не можат да се заменат.“
Стратегија + интуиција = вистинска формула
Клучот за успех во ПР, според неа, лежи во балансот.
Најдобро функционира кога стратегијата знае кога да ја послуша интуицијата. Едната дава насока, другата чувство и такт.“
Стратегијата ја поставува рамката – но интуицијата знае кога да излезе од неа.
Дали постои „женски“ пристап во комуникацијата?
Карпузовска не верува во поделби.
Не постои машка и женска комуникација – постои добра и лоша. Разликата доаѓа од искуството и перспективата, не од полот.“
Поврзани објави
Совет до младите: Не победува најгласниот
Нејзината порака до новите генерации е јасна и прецизна:
Во ПР не победува најгласниот, туку оној што најдобро разбира. Бидете свои. Добрите комуникатори пренесуваат пораки, одличните ги обликуваат.“
И уште нешто важно:
Научете кога да зборувате – но и кога да не зборувате. Тишината понекогаш е погласна од најдобрата кампања.“
Грешките – најискрениот ментор
Карпузовска отворено признава дека грешките се неизбежни – и неопходни.
Грешките се непријатни, но се и најискрениот ментор.“
Лекции што би сакала порано да ги знае
Не мора сè да биде совршено за да биде вредно. И ‘не знам’ е сосема легитимен почеток.“
Таа нагласува и дека не треба да се прифаќа првиот одговор – бидејќи најдобрите решенија ретко се најбрзите.
Време без притисок – вистински луксуз
Надвор од професионалниот свет, нејзината дефиниција за квалитетно време е едноставна:
Без потреба за брз одговор. Исклучена од мрежата, вклучена во моментот.“
Музика, книги и тишина – простор каде што мислите конечно добиваат глас.
БРЗИ ОДГОВОРИ ШТО КАЖУВААТ МНОГУ
Најпотценета вештина?
Слушањето – не за да одговорите, туку да разберете.
Што никогаш не простувате?
Манипулација – кога зборовите и делата не се совпаѓаат.
Навика што ве издвојува?
Помалку зборови, повеќе дела.
Разговарала: Јована Стојменовиќ
Фото: приватна архива