Како што старее кучето, така се менуваат и неговите нутритивни потреби, а често и самото јадење станува потешко. Поради проблемите како што се: ослабени или изгубени заби, чувствителни непца и побавно варење, исхраната мора внимателно да се приспособи на возраста и здравствената состојба на миленикот.
Добро избалансираната и соодветна исхрана може значително да му помогне на повозрасното куче да одржи здрава телесна тежина, посилен имунитет и доволно енергија, дури и во подоцнежните години.
Правилно приготвени гранули
Гранулите и понатаму можат да бидат одличен избор, дури и кога кучето нема заби — важно е само правилно да се приготват. Доколку се прелеат со топла вода, пилешки бујон или супа од коски и се остават неколку минути да омекнат, тие се претвораат во мека кашеста смеса.
Така приготвената храна станува лесна за јадење и кучето може да ја консумира без потреба од џвакање. Некои сопственици дополнително ги мелат гранулите во блендер или мелница за кафе пред да ги потопат, со што храната станува уште поситна и полесна за варење.
Предноста на ваквиот начин на исхрана е тоа што кучето и понатаму ги добива својата вообичаена храна и истите хранливи состојки, но во форма што му е значително полесна за консумирање.
Влажната храна и паштетите се најпрактично решение
Влажната храна и паштетите честопати се наједноставното и најпрактично решение за кучиња што имаат малку или воопшто немаат заби. Нивната мека структура овозможува лесно џвакање и голтање, а по потреба можат дополнително да се изгмечат или разредат со топла вода за да бидат уште полесни за консумирање.
Сепак, многу е важно да се избира квалитетна храна со висок удел на месо и што помалку вештачки додатоци. Бидејќи повозрасните кучиња имаат почувствителен дигестивен систем, прекумерната количина адитиви и засилувачи на вкус може да предизвика дигестивни проблеми.
Домашната храна може да биде одличен избор
Домашно приготвената храна може да биде многу добра опција, но само доколку е правилно нутритивно избалансирана. Многу сопственици ја избираат токму затоа што на тој начин имаат целосна контрола врз состојките.
Поврзани објави
Варено месо, како пилешко, мисиркино или риба, комбинирано со зеленчук како морков, тиквички и сладок компир, може да претставува квалитетен и хранлив оброк. По приготовката, најдобро е сè да се изблендира во мека смеса, без коски и тврди делови, за кучето полесно да јаде.
Мали количества ориз или овесна каша дополнително можат да помогнат во варењето и да обезбедат енергија. Сепак, важно е домашната исхрана да биде нутритивно избалансирана, па затоа се препорачува повремена консултација со ветеринар за кучето да ги добива сите неопходни хранливи материи, витамини и минерали.
Суровата исхрана бара дополнителна претпазливост
Од друга страна, суровата исхрана бара особено внимание. Во најголем број случаи, таа не е погодна за повозрасни кучиња без заби, бидејќи суровото месо, а особено коските, можат да предизвикаат задушување или дигестивни проблеми.
Кај кучиња со ослабен имунитет постои и поголем ризик од бактериски инфекции. Доколку сепак се размислува за ваков начин на исхрана, неопходно е претходно да се консултира ветеринар, а сите промени да се воведуваат постепено и внимателно.
Помали, а почести оброци
На повозрасните кучиња најчесто повеќе им одговараат помали, но почести оброци, наместо големи порции одеднаш. Храната треба да биде мека, лесно сварлива и богата со квалитетни протеини и здрави масти, за да обезбеди доволно енергија без дополнително оптоварување на организмот.
Особено внимание треба да се посвети и на внесот на течности, бидејќи постарите кучиња често природно пијат помалку вода отколку порано, што може негативно да влијае врз нивното здравје.
Доколку кучето почне да одбива храна, губи телесна тежина, тешко голта или повраќа, причината не мора да биде само во забите. Ваквите симптоми можат да укажуваат и на посериозни здравствени проблеми, па прегледот кај ветеринар е најбезбедното и најодговорното решение.
Фото: Freepik