Ветеринарка открила за што размислуваат кучињата пред крајот: „Тоа е последното нешто што можете да им го дадете“

Збогувањето со домашниот миленик е еден од најтешките моменти низ кој поминуваат многу сопственици. Иако помислата на последните заеднички мигови е исклучително болна, пораката на една ветеринарка трогнала милиони луѓе ширум светот и покренала важна тема – што сакаат кучињата во своите последни моменти?

Ветеринарката доктор Морган објавила емотивна порака во која објаснила зошто сопствениците не би требало да ги напуштаат своите миленици при евтаназија или на самиот крај од нивниот живот.

„Знаеме дека кучињата мислат на нас кога нè нема, но истражувачите сакале да дознаат што им е најважно во последните мигови“, напишала таа.

Според нејзините зборови, набљудувањето кучиња кои добивале нега до крајот на животот покажало впечатлива шема – тие не бараат храна, играчки или некаква друга утеха, туку со погледот го бараат својот сопственик.

„Последната мисла на вашето куче не е ‘се плашам’ или ‘ме боли’. Неговото прашање е: ‘каде си?’“, истакнала ветеринарката.

Таа објаснила дека многу сопственици не можат да го поднесат емоционалниот товар и одбираат да не бидат присутни за време на последните мигови на нивниот миленик. Сепак, токму тогаш на кучињата најмногу им значи присуството на личноста на која најмногу ѝ веруваат.

„Гледаат кон вратата и чекаат да се вратите, бидејќи дотогаш секогаш сте се враќале“, навела таа.

Поради тоа, апелира до сопствениците, доколку се во можност, да останат покрај своите миленици до самиот крај.

„Тоа можеби е најтешкото нешто што некогаш ќе го направите, но тоа е и последниот подарок што можете да им го дадете. Последното лице што ќе го видат нека биде вашето, а последниот допир што ќе го почувствуваат нека биде од вашата рака“, порачала таа.

Бројни ветеринари ги поддржале нејзините зборови, истакнувајќи дека еден од најтешките моменти од нивната работа е кога ќе видат куче кое во последните мигови вознемирено го бара својот сопственик.

Што вели науката?

Иако нема докази дека кучињата ја доживуваат смртта на истиот начин како луѓето, експертите потврдуваат дека тие се исклучително чувствителни на промените во своето опкружување. Благодарение на развиеното сетило за мирис, можат да регистрираат бројни физиолошки промени кај луѓето и животните, вклучувајќи болести, промени на нивото на шеќер во крвта, па дури и состојби што им претходат на сериозни здравствени проблеми.

Поради тоа, многу научници сметаат дека кучињата можат да ги забележат и промените што ѝ претходат на смртта, иако сè уште не е потполно разјаснето како ги доживуваат. Во секој случај, сигурно е дека врската меѓу кучето и неговиот сопственик е исклучително силна – до самиот крај.

ФОТО: Freepik