Мозокот е најсложениот орган и неговите болести доведуваат до стагнација во работата на многу системи во организмот. Затоа, потребни се најпрецизни методи за да се испита мозокот.
СОС-сигнали: Индикации за испитување може да бидат следните симптоми: расеаност (сомнеж за Алцхајмерова болест), тежина во главата, слабост, шум во ушите, вртоглавица (претстоен мозочен удар), главоболка, утринско повраќање, недостиг од емоции, ментално растројство (тумори на мозокот), губење на свеста, грчеви (епилепсија). Покрај тоа, дијагностиката е важна и во случај на атеросклероза, дијабетес, пред планирана операција на срцето, при траума на главата и на черепот, повреди на главата и на ‘рбетот.
УЛТРАЗВУЧНА ДОПЛЕРОГРАФИЈА
Тоа е комбинација на ултразвук и метод на доплерографија. Благодарение на тоа, може да се процени протокот на крв на големите и средните крвни садови на главата и на вратот и може да се откријат првите знаци на патологија, како што се атеросклеротични лезии. Овој метод не бара подготовка и нема контраиндикации, освен неможноста човекот да биде во лежечка положба.
ЕХОЕНЦЕФАЛОГРАФИЈА
Оваа ултразвучна дијагностика е пропишана во случај на повреди на черепот и мозокот, сомневање за тумор, како и со цел да се добијат информации за состојбата на крвните садови на главата и активноста на мозокот. Не бара подготовка и е целосно безбедна.
РЕОЕНЦЕФАЛОГРАФИЈА
Се користи за дијагностицирање тумори, повреди на главата, епилепсија и мигрена, за да се процени функционалноста на крвните садови. Исто така, помага да се откријат локални повреди и да се утврди степенот на снабдување со крв на делови од мозокот. Овој метод се користи и за време на породувањето, за да се испита хемодинамиката на плодот. Безбедна е и нема контраиндикации.
ЕЛЕКТРОЕНЦЕФАЛОГРАФИЈА
Електроенцефалографијата ги испитува електричните импулси на мозокот. Испитувањето се изведува во случај на бавен психомоторен развој кај деца, за време на траума на мозокот, епилептични напади, за да се дијагностицира состојбата на крвните садови, за сложено испитување на мозокот, како и за време на нарушувања на спиењето и психички растројства.
Методот е безбеден, сепак, пред неговата примена, треба да престанете да земате спазмолитици (лекови против грчеви) и антиконвулзиви (се користат во случај на епилепсија).
ЕЛЕКТРОНЕВРОМИОГРАФИЈА
Ја регистрира електричната активност на мускулите, благодарение на што помага за откривање на заболувања на периферниот нервен систем и невромускулни заболувања.
Поврзани објави
МАГНЕТНА РЕЗОНАНЦА
За време на прегледот, радиобрановите дејствуваат на мозокот, што овозможува да се направат неговите слоевити слики. Благодарение на магнетната резонанца, можеме да го видиме мозокот во тродимензионален формат и да добиеме информации за неговата структура и патологии.
Методот е индициран во случај на интракранијален притисок (во внатрешноста на черепот), повреди на главата, неоплазми на мозокот, заразни болести, аномалии во структурата на мозокот и крвните садови.
Контраиндикации: доколку човекот има метална протеза, импланти, пејсмејкер во телото.
МАГНЕТНА РЕЗОНАНТНА АНГИОГРАФИЈА
Сигурен метод за утврдување на состојбата на крвните садови и продолжениот мозок. Се користи за време на нарушувања во работата на крвните садови на вратот и на мозокот (мали удари, тромбоза).
ПОЗИТРОНСКА ЕМИСИОНА ТОМОГРАФИЈА
Современ метод кој ја дијагностицира функционалната активност на мозокот, открива тумори од еден сантиметар, Алцхајмерова болест, епилепсија, исхемични нарушувања, потрес на мозокот.
Контраиндикации: бременост, период на лактација.
КОМПЈУТЕРСКА ТОМОГРАФИЈА
Популарната терапија ги открива практично сите патологии, од воспалителни процеси до неоплазми (тумори) и му овозможува на лекарот да ја утврди вистинската дијагноза. Во оваа ситуација, зрачењето е мало, така што овој метод е дозволен и за деца.
! Одлуката за спроведување на некоја процедура ја донесува само лекар! Тој може да побара неколку различни прегледи за да се прецизира дијагнозата.
Пишува за „Руски доктор“: Ала Королјева, интернистка, Гродно
Фото: Getty Images