Морската вода сама по себе не е опасна, но предолгиот престој во неа, во комбинација со сонцето и солта, може да ја исуши и иритира чувствителната детска кожа.
Многу родители веруваат дека морската вода е секогаш добра за кожата, но педијатрите и дерматолозите предупредуваат дека тоа не е сосема точно. Иако минералите и солта кај некои деца можат привремено да ја подобрат состојбата на кожата, особено кај одредени воспалителни состојби, предолгиот престој во морето може да ја наруши природната заштитна бариера на кожата. Детската кожа е значително потенка од кожата на возрасните, побрзо губи влага и многу полесно се суши и иритира.
Експертите советуваат бебињата и малите деца да не поминуваат долго време во морето во еден континуитет. Кај бебињата под шест месеци воопшто не се препорачува директно изложување на силно сонце, а капењето треба да биде многу кратко и под постојан надзор. Кај поголемите деца, престојот во вода е подобро да трае околу 10 до 20 минути, по што е добро да направат пауза во сенка, да се напијат течности и да се исплакнат со чиста вода ако остануваат подолго на плажа. На овој начин се намалува дејството на солта која, кога ќе се исуши на кожата, извлекува дополнителна влага и може да предизвика затегнатост, чешање и црвенило.
Поврзани објави
Посебно внимание треба да се обрне кај децата со атописки дерматитис (егзема). Кај некои од нив морската вода може привремено да ги намали симптомите, но кај други солта може да предизвика печење и дополнителна иритација, особено ако имаат оштетена кожа или мали ранички. Американската академија за педијатрија препорачува по капење кожата нежно да се избрише без силно триење и веднаш да се нанесе хидратантен крем за да се задржи влагата во кожата.
Дерматолозите потсетуваат дека најголем проблем не е само морската вода, туку комбинацијата од сол, УВ-зраци, ветер и високи температури. Затоа децата треба да носат крем со заштитен фактор 30 или 50+, заштитна облека кога е можно, да престојуваат во сенка во периодот од 10 до 16 часот и секогаш по капење да се исплакнат со слатка вода. Со овие едноставни навики, престојот на море останува безбеден, а ризикот од сушење, иритација и оштетување на кожата значително се намалува.
pexels – dete – more – leto