Нутриционист открива која комбинација на намирници за појадок е најдобра за работата на цревата
Микробиомот богат со добри бактерии е клучен, не само за правилна дигестија, туку и за целокупното здравје на организмот. Научните истражувања последниве години сè почесто укажуваат на тоа дека рамнотежата на микроорганизмите во цревата влијае врз имунитетот, регулацијата на телесната тежина, нивото на енергија, но и на менталното здравје – вклучувајќи ги расположението, квалитетот на сонот и способноста за концентрација. Постојат и докази дека здравиот цревен микробиом може да игра улога во превенцијата на когнитивен пад и невродегенеративни болести во подоцнежната животна доба.
Токму затоа, експертите нагласуваат колку е важно да се започне денот со храна што ја поддржува оваа невидлива фабрика на здравјето. Една од нив е гастроентерологот доктор Каролин Сојка, која истакнува дека појадокот може да биде пресуден за создавањето здрава основа за целиот ден.
Според неа, идеалниот утрински оброк би требало да содржи комбинација на храна богата со протеини, здрави масти и пробиотици – нутриенти кои ги хранат добрите бактерии во цревата и го поттикнуваат нивниот раст.
„Јајцата и кефирот се одличен начин да внесете протеини, како и здрави пробиотици кои се одлични за диверзификација на цревниот микробиом“, објаснува доктор Сојка.
„Оваа едноставна комбинација ја дава потребната енергија, го стабилизира нивото на шеќер во крвта и истовремено го штити здравјето на дигестивниот систем.“
Поврзани објави
Кефирот, како ферментирана млечна напивка, природно е богат со различни соеви корисни бактерии и квасец. Токму таа разновидност го прави еден од најефикасните пробиотички производи за секојдневна употреба. Редовната консумација на кефир се поврзува со подобра дигестија, појак имунитет и намалување на нивоата на воспаленија во организмот.
Од друга страна, јајцата се вистинска нутритивна бомба. Покрај висококвалитетни протеини кои придонесуваат за чувство на ситост во текот на целото утро, содржат и омега-3 масни киселини, витамини Б комплекс и витамин Д – нутриенти кои се есенцијални за работата на нервниот систем, правилната функција на мозокот и стабилизацијата на хормонската рамнотежа.
Заедно, овие две намирници сочинуваат појадок кој е едноставен, практичен, брз за подготовка, а истовремено исклучително корисен за здравјето на цревата и целокупната благосостојба.
ФОТО: Pixabay