Ви опаѓа косата по прележување на коронавирусот? Ова може да ви помогне!

Проблемот со губењето на косата по коронавирусот стана една од најчестите причини за посета на ендокринолог. Постојат теории што објаснуваат зошто ја губиме косата по прележување на ковид-19:

* Кога вирусот ќе влезе во телото, сите ресурси се насочуваат да се борат против него, што може да ги занемари „помалку важните“ процеси (исхраната на скалпот, квалитетот на косата…).

* Вирусот со себе носи не само ризик од згрутчување на крвта туку и ја нарушува исхраната на ткивата, што може негативно да влијае на растот на косата.

* Секоја болест, вклучувајќи ја и инфекцијата со коронавирус, предизвикува недостиг од одредени витамини и елементи. Недостигот од железо и витамините Б е особено опасен.

* За време на корона никако не може да се исклучи ефектот на стрес. Во овој случај стресот не е поврзан само со болеста туку и со целата ситуација поврзана со пандемијата.

* Опаѓањето на косата може да се гледа и како несакано дејство од долготрајната употреба на лекови како што се одредени антибиотици и кортикостероиди – настанува интоксикација на целиот организам и се нарушуваат основните метаболички процеси.

ШТО ДА СЕ ПРЕЗЕМЕ

Ако сакате да ѝ помогнете на вашата коса да заздрави од сериозна вирусна болест, тогаш ви препорачуваме да го промените вашиот начин на живот.

* Променете ја исхраната

Прво, важно е да се „претресе“ исхраната и да се состави балансирано здраво мени. За да подготвите рационално мени, прво мора да го одредите дневното внесување калории. Според количеството на калории, направете мени што вклучува намирници богати со железо, витамини Б и Д, цинк, протеини и есенцијални масни киселини. Не заборавајте да ги исфрлите од исхраната солената, мрсната, пржената, брзата храна и газираните пијалаци, како и индустриските шеќери. Внесувајте непреработени производи чие потекло го знаете.

* Имунитетот горе, стресот долу

Второ, почнете да го зајакнувате имунитетот и обидете се да ги ограничите стресот и негативните емоции. Работата и животот под стрес играат клучна улога во борбата против опаѓањето на косата. Кога го намалувате нивото на стрес, телото ја регулира хормоналната нерамнотежа.

Спорт, јога, прошетки на отворено и здрав сон во континуитет ќе ви помогнат да се справите со оваа задача. Многу е важно да си легнете пред 23 часот навечер и да спиете следните осум часа. Имено, во тоа време се произведуваат посебни хормони чија цел е обновување на имунитетот.

* Правилна нега на косата

Третото правило е нежно обликување на косата и правилна нега. Користете мек чешел за чешлање на косата. Не кинете ги прамените и полека чешлајте ги. Особено внимателно чешлајте ја влажната коса, бидејќи е многу кршлива. Мијте ја косата најмногу трипати неделно, и тоа само со нежни шампони, без сулфати и парабени, а по миењето нанесувајте хранливи маски.

Барем неколку месеци престанете со агресивни хемиски процедури, како што се извлекување прамени, белење, минивал, често боење итн., бидејќи тие само ќе ја влошат состојбата на косата и ќе придонесат за нејзино губење. Не заборавајте да ја навлажнувате и негувате косата.

Хидратантните средства ја обновуваат и негуваат оштетената коса и спречуваат понатамошно оштетување. Тоа може да бидат домашни маски или купени хидратантни препарати.

* Масирајте ја главата

Масажата на главата, доколку се прави редовно, придонесува за подобрување на циркулацијата на крвта и хранливите материи. Опаѓањето на косата значително се намалува доколку кожата се збогатува со хранливи материи за време на масажата на главата.

Затоа, пред масажата, капнете неколку капки рицинусово или бадемово масло на рацете и правете кружни движења со рацете, минимално притискајќи ја кожата. Оваа едноставна масажа совршено го стимулира растот на косата.

* Време е за потстрижување

Ако сте уморни од опаѓање на косата, обидете се да ја скратите косата. Кратката фризура ќе го прикрие оштетувањето на косата. Исто така, колку е пократко и полесно влакното, толку е полесно да се задржи на главата. Новата, млада коса брзо ќе го скрие недостигот од густина и ќе ѝ даде на фризурата атрактивен изглед.

Ако кратка фризура не ви одговара, тогаш има смисла да размислите за брановидна коса. Имено, кадравата коса изгледа побујно, додека правата ги нагласува недостатоците. Но избегнувајте да користите пегли и преси за виткање. Тоа може да го постигнете со самолепливи виткачи или со меки папилоти.

* Колаген и пантенол

Витамините, минералите и колагенот дефинитивно можат да ѝ помогнат на косата. Колагенот ги храни влакната однатре и ја намалува можноста за нивно опаѓање. Од витамините, корисни се биотин (Б7), витамин Ц, витамин Е, железо и цинк.

Овие додатоци во исхраната немаат многу контраиндикации, но подобро е да се консултирате со лекар пред да ги земете. Пантенолот е исклучително корисна состојка за косата, затоа погледнете ги етикетите и изберете производи што го содржат или нанесете го независно од тоа (прашајте го вашиот аптекар).

Косата и анализа на крвта – има некоја тајна врска

Општите и биохемиските тестови на крвта имаат цел да го одредат нивото на хемоглобин и да идентификуваат други знаци на анемија, кои резултираат со губење на косата. Биохемиската анализа ја одразува функционалната состојба на црниот дроб и бубрезите, како и главните показатели за метаболизмот.

Во проучувањето на крвниот серум, особено внимание му се посветува на феритинот. Пациентите што имаат ниско ниво на железо во крвта страдаат од бавен раст на косата и нејзино губење.

Кога станува збор за хормоните, акцентот е ставен на нивото на хормоните што ја одредуваат функцијата на тироидната жлезда. Со дисфункција на тироидната жлезда се јавуваат голем број метаболички процеси, што доведува до прекумерно опаѓање на косата. Концентрацијата на витамини и минерали е исклучително важна.

На пример, витаминот Д е регулатор на метаболизмот на калциум-фосфор, кој е неопходен за одржување на растот на косата. Покрај тоа, овој витамин го поддржува имунолошкиот систем, а исто така овозможува побрзо закрепнување по болест.

Освен витамините, мора да ја запомните и улогата на одредени елементи: цинк, селен, калциум. За нивна асимилација е потребно да се води сметка за доволно внесување на витамините А, Е и оние од групата Б.

Народната медицина препорачува

* Педесет грама сечкани црвени лути пиперки прелејте со половина литар вотка или домашна ракија и оставете го тоа да отстои една недела. Добиеното средство втривајте го во кожата на главата и коренот на косата наутро и навечер.

* За да го спречите опаѓањето на косата и да ја зајакнете, правете маска трипати неделно: 50 мл рицинусово масло измешајте со лажица сенф во прав, нанесете го тоа на косата и коренот на 30 минути, а потоа внимателно измијте ја косата со бебешки шампон.

* Чај од лепка (лат. Galium aparine): една лажица од билката оставете да отстои еден час во шолја превриена вода. Пијте по две лажици трипати на дан, а исто така користете го и како лосион за глава.

* Листовите од коприва во вид на одвар или тинктура имаат широка примена за плакнење или како лосион по миење на косата – за зајакнување и поттикнување на растот на косата. Одвар: една лажица суви листови од коприва прелејте со 300 мл врела вода, оставете да отстои 30 минути, па процедете. Тинктура: 50 г суви листови прелејте половина литар вотка, оставете да отстои две недели, па процедете.

* Одвар од стебленца од морков: 100 г суровина варете во литар вода 10 минути, оставете да отстои 30 минути, па процедете. Измијте ја косата со овој одвар, а потоа завиткајте ја влажната глава со крпа (не плакнете!) и оставете да дејствува прекуноќ.

Текст: Руски доктор

Фото: Getty Images