Што е АТГ-систем на вежбање и зошто е толку ефикасен?

Бидете вити и здрави

Разговаравме со Иван Трпчевски, АТГ-тренер, тренер по пливање и национален првак во триатлон (@atg_macedonia)

Во превод значи Група за атлетската вистина, а станува збор за посебен систем на вежбање, создаден од страна на Бен Патрик (@kneesovertoesguy), кој се заснова на вистината за тоа како треба природно да се вежба човечкото тело за да биде подготвено да ги издржи секојдневните физички предизвици. АТГ-тренерот Иван Трпчевски ни објасни и која е разликата помеѓу овој систем на вежбање и другите популарни типови тренинг:

„Тоа е тренинг за сила и физичка кондиција, исто како и кросфит, бодибилдинг и слично, само што вежбите и тренинзите се изведуваат на различен начин. Сите вежби имаат цел да го направат телото поатлетско и поспособно, без притоа да се ризикува повреда. Нема натпревар, туку се работи контролирано за секое движење да биде квалитетно изведено. Се работи во целосен опсег на движење, што е ретко кај другите типови вежбање.“

КАКО ИЗГЛЕДА ЕДЕН АТГ-ТРЕНИНГ И КОИ СЕ ПРИДОБИВКИТЕ?

Во АТГ се прават вежби што ги зголемуваат силата и мобилноста на целото тело и го балансираат соодносот помеѓу лева-десна, горна-долна, предна-задна страна од телото. Се состои од прецизно дефинирани програми со стандардизирани вежби и точно одредени цели што ја зголемуваат физичката способност на секој дел од телото. Треба секоја седмица да се напредува на вежбите за да се постигне целта, објаснува Иван и додава дека буквално секој може да вежба АТГ.

„Тренираме професионални спортисти и луѓе што рекреативно се занимаваат со спорт, но и повозрасни луѓе, луѓе што имаат претежно седечка работа, луѓе со болки, како и деца.“

А придобивките се огромни! Вежбите ќе го зајакнат целото тело и ќе ве направат поотпорни на болки и повреди, но и ќе ви ги решат постојните проблеми, со што ќе се зголеми вашата физичка способност.

ПРОБАЈТЕ!

Иван ни предложи две АТГ-вежби што можете да ги пробате и дома…

1 Tibialis Raise

Број на повторувања: 25

Како: Поставете го задникот спроти ѕид и испружете ги нозете на комфорна далечина. Без виткање на колената, подигнете ги прстите нагоре, задржете ги 2 секунди и полека спуштете го стапалото.

Зошто: Мускулот тибиалис го користиме со секој чекор што го правиме. При спортување, овој мускул многу се напрега и ако не може да го поднесе напорот, тој се пренесува директно на коленото. Ако го зајакнете овој мускул, ќе спречите многу повреди и болки во долниот дел од телото.

2 ATG Split Squats

Број на повторувања: по пет со левата и десната нога

Како: Едната нога се поставува назад, а другата напред во исчекор. Стапалото треба да е поставено на степер, скала или кутија. Од оваа позиција, полека туркајте се нанапред со предното колено, сè додека листот и задната ложа од ногата се допрат целосно. Петицата на предната нога може да биде подигната. Задржете се кратко, па подигнете се нагоре. Телото треба да е исправено.

Зошто: Вежбата ги зајакнува колената и ја зголемува силата на предниот и долниот дел на нозете и стапалата. Ги балансира левата и десната страна. Ја зголемува мобилноста на скочниот зглоб, како и силата и флексибилноста на мускулите во предниот дел од колкот.

Разговарала: Марија Лукаревска

ФОТО: ПРИВАТНА АРХИВА

Фитнес-совети од Емилија Колоска: Кои се најдобрите вежби за обликување на струкот?
Прочитајте и

Коментарите се заклучени.

Сакаш посебен третман?
Зачлени се во елитниот клуб. Регистрирај ја својата е-адреса и добивај специјални понуди и вести
Одјава е можна во секое време