Кое е вашето фитнес-гориво? Ви откриваме што треба да внесувате пред, за време и по тренинг!

Бидете вити и здрави

Нашите дилеми ги разреши Ана Марија Кузмановска, студентка по диететика

Храната е еден вид гориво што ни дава сила за вежбање, но дали сте сигурни дека ги консумирате вистинските намирници? Дознајте што треба да внесувате пред, за време и по тренинг за да може вашето тело да постигне оптимални резултати.

Вистина или заблуда: Не е добро да се консумира мрсна храна пред тренинг.

Делумно вистина: Зависи од тоа што тренираме и каква ни е секојдневната исхрана. Мрсната храна е потешка за дигестија и затоа треба да избегнуваме да внесуваме многу мрсна храна кратко време пред тренинг, во спротивно може да ни биде тешко и да не ја добиеме потребната енергија за вежбање. Во зависност од тоа каков тренинг ќе имаме (повисоко или понискоинтензивен), оброкот пред вежбање најважно е да содржи мешавина на јаглехидрати со висок и низок гликемиски индекс и протеини. Примери за оброци пред вежбање: сендвич со интегрално лепче, грчки јогурт со овошје и гранола, овесна каша со овошје и путер од јатки, овесни палачинки, кашест сок со протеин, интегрална паста со пилешко.

Вистина или заблуда: За вежбачите најважни се протеините.

Заблуда: За оптимално функционирање на телото е потребен балансиран внес на сите три макронутриенти (протеини, масти и јаглехидрати). Пиењето протеини пред вежбање не е погрешно, најдобро е да се внесуваат минимум три оброци во денот што ќе содржат доволно количество протеини и помеѓу овие оброци да не поминат повеќе од 4-5 часа.

Вистина или заблуда: По напорен тренинг, дозволено е да се внесе покалорична храна за да се надоместат потрошените калории.

Делумно вистина: Зависи која е нашата цел. За оптимални перформанси, закрепнување од тренинзи и контрола на шеќерот во крвта, најголемите оброци во текот на денот треба да ни бидат сконцентрирани во периодот кога сме најактивни, но не значи дека ако тренираме, можеме да јадеме огромни количества храна. По напорен тренинг најдобро е да внесеме балансиран оброк, кој ќе ги содржи сите макронутриенти. Примери за вакви оброци се месо со ризото со зеленчук, омлет со зеленчук и интегрално лепче, овесни палачинки со овошје, туна-сендвич, тофу со кускус и зеленчук.

Вистина или заблуда: Ако не сме жедни, тоа значи дека сме испиле доволно вода.

Делумно вистина: Со промена само на 1-2% од осмоларноста на плазмата, човекот почнува да чувствува жед, што значи дека имаме многу добро развиени механизми што ни кажуваат кога да пиеме вода. Но честопати луѓето знаат и да го занемарат ова чувство. За време на тренинзи во кои многу се потиме, се губи поголемо количество вода, но и електролити и затоа тие треба да се надоместат. Некои од незабележливите знаци на дехидрација се помалку потење, поконцентрирана урина, сува кожа и уста, замор, вртоглавица.

Вистина или заблуда: Подобро е да се вежба на празен стомак отколку на полн.

Заблуда: Не треба да се вежба ни кога сме прејадени, ни кога сме многу гладни. Некои луѓе не чувствуваат многу глад наутро и претпочитаат да вежбаат гладни, што е во ред, сè додека внесуваат добро избалансиран оброк веднаш по тренингот. По обилен оброк што нè оставил доста сити, треба да поминат 2-3 часа пред тренингот, но по ужина може да поминат и само 30-60 минути пред тренингот.

Вистина или заблуда: Ако не сме стигнале навреме да изедеме добро балансиран оброк, доволно е да внесеме протеински бар за да имаме енергија за вежбање.

Вистина: Доколку чувствуваме доволно сила да го поминеме тренингот само со протеински бар, тоа е сосема во ред. Во ситуација кога не сме стигнале да изедеме добро избалансиран оброк, но сме решиле да вежбаме, најдобро е да процениме како се чувствуваме и да избереме некој од помалку интензивните тренинзи што ни се планирани за неделата. Секогаш треба да го слушаме нашето тело.

Вистина или заблуда: Енергетските напивки што содржат електролити се добар додаток за време на вежбањето.

Делумно вистина: Доколку вежбањето е долго, високоинтензивно и проследено со многу потење, енергетските напивки со електролити може да бидат добар додаток за време на тренингот. Но доколку вежбањето е нискоинтензивно, не е проследено со многу потење и целта ни е загуба на телесна тежина, тоа може да биде лоша одлука. Енергетските напивки честопати се и доста калорични и ако целта ни е да ослабиме, а сакаме да имаме високоинтензивни тренинзи, може да одбереме напивки со електролити што се нискокалорични.

Вистина или заблуда: Ако редовно вежбаме по еден час дневно, дозволено ни е почесто да консумираме брза храна и да поминуваме повеќе време во лежење.

Заблуда: Еден час вежбање дневно не е замена за активен живот. Движењето секогаш треба да ни биде приоритет и водењето активен живот е задолжително. Врз нашата тежина најголемо влијание има енергетскиот баланс. Доколку внесуваме исто толку енергија колку што трошиме – ќе ја одржуваме телесната тежина. Доколку внесуваме помалку енергија одошто трошиме – ќе губиме телесна тежина. А доколку внесуваме повеќе енергија отколку што трошиме – нашата тежина ќе се зголеми. Тоа е законот за термодинамика и важи кај сите, но сепак секој има различни енергетски потреби.

Нашите дилеми ги реши Ана Марија Кузмановска, студентка по диететика. На нејзиниот инстаграм-профил @anamarija.kuzmanovska можете да најдете уште многу други фитнес-совети и идеи за здрави оброци

Подготвила: Марија Лукаревска

ФОТО: GULIVER/GETTY IMAGES, ПРИВАТНА АРХИВА

loading...
Прочитајте и

Оставете одговор

Вашата мејл-адреса нема да биде прикажана.

Ви благодариме за коментарот!

This site uses Akismet to reduce spam. Learn how your comment data is processed.

Сакаш посебен третман?
Зачлени се во елитниот клуб. Регистрирај ја својата е-адреса и добивај специјални понуди и вести
Одјава е можна во секое време